ભારત અને રશિયા દ્વારા સંયુક્ત રીતે બનાવવામાં આવેલ વિશ્વની સૌથી ઝડપી ક્રૂઝ મિસાઈલ બ્રહ્મોસ સમગ્ર વિશ્વમાં લોકપ્રિયતા મેળવી રહી છે. ચીનની આક્રમકતા સામે ઝઝૂમી રહેલા ફિલિપાઈન્સને ભારતે બ્રહ્મોસ મિસાઈલોની સપ્લાઈ કરી છે. અહેવાલો અનુસાર, આ શ્રેષ્ઠ સુપરસોનિક ક્રૂઝ મિસાઈલ ખરીદવા માટે ઓછામાં ઓછા ત્રણ વધુ દેશો ભારત સાથે કરાર કરી શકે છે. બ્રહ્મોસ એરોસ્પેસના જોઈન્ટ મેનેજિંગ ડિરેક્ટર એલેક્ઝાન્ડર બી માકશિચેવે એક રશિયન ન્યૂઝ એજન્સી સાથે વાત કરતા કહ્યું કે ચીનના પાડોશી વિયેતનામ, વિશ્વના સૌથી મોટા મુસ્લિમ દેશ ઈન્ડોનેશિયા અને સંયુક્ત આરબ અમીરાત (યુએઈ) આ મિસાઈલને લઈને વાતચીત કરી રહ્યા છે.
બ્રહ્મોસ મિસાઈલ તેની ઝડપ અને ચોકસાઈ માટે વિશ્વભરમાં જાણીતી છે. અત્યાધુનિક સુપરસોનિક ક્રૂઝ મિસાઇલ બ્રહ્મોસને ભારતના સંરક્ષણ સંશોધન અને વિકાસ સંગઠન (DRDO) અને રશિયાના NPO મશિનોસ્ટ્રોયેનિયા વચ્ચેના સંયુક્ત સાહસ દ્વારા વિકસાવવામાં આવી છે. “યુએઈ, ઇન્ડોનેશિયા અને વિયેતનામ આ મિસાઇલમાં પ્રથમ દ્રષ્ટિએ રસ બતાવે છે,” એલેક્ઝાન્ડરે કહ્યું. તેમણે કહ્યું કે બ્રહ્મોસ મિસાઈલની સપ્લાય માટે આ ત્રણ દેશો સાથે કરાર થઈ શકે છે. જોકે, તેમણે એ નથી જણાવ્યું કે મિસાઈલ ડીલ માટે વાતચીત ક્યાં સુધી પહોંચી છે.
બ્રહ્મોસ મિસાઈલ ખરીદનાર ફિલિપાઈન્સ વિશ્વનો પ્રથમ દેશ હતો. બ્રહ્મોસ મિસાઈલનું નામ ભારતની બ્રહ્મપુત્રા નદી અને રશિયાની મોસ્કવા નદીના નામ પરથી રાખવામાં આવ્યું છે. આ મિસાઈલ ભારતના ત્રણેય સશસ્ત્ર દળોમાં સામેલ છે. આ મિસાઈલની રેન્જ 300 થી 500 કિલોમીટર છે, તે સ્ટીલ્થ ટેક્નોલોજીથી સજ્જ છે જેના કારણે દુશ્મન માટે તેને ટ્રેક કરવું સરળ નથી.
હાલમાં, રશિયા અને ભારત બ્રહ્મોસ મિસાઇલના હાઇપરસોનિક સંસ્કરણ પર સાથે મળીને કામ કરી રહ્યા છે. તેને બ્રહ્મોસ 2 નામ આપવામાં આવ્યું છે. આ નવી મિસાઈલ મેક 6ની હાઈપરસોનિક સ્પીડથી દુશ્મન પર હુમલો કરવામાં સક્ષમ હશે. નવી બ્રહ્મોસ મિસાઈલની અંદર હાઈપરસોનિક સ્ક્રેમજેટ ટેક્નોલોજી લગાવવામાં આવી રહી છે. અગાઉ, ફિલિપાઇન્સે વર્ષ 2022માં ભારત સાથે $375 મિલિયનના કરાર પર હસ્તાક્ષર કર્યા હતા. ભારતે ફિલિપાઈન્સને એન્ટી શિપ બ્રહ્મોસ મિસાઈલ પણ આપી છે. વિશ્વમાં વધી રહેલા તણાવ વચ્ચે UAE, ઈન્ડોનેશિયા અને વિયેતનામ પણ ભારત-રશિયાના આ સાહસ તરફ નજર કરી રહ્યા છે. ત્રણેય દેશો સાથે ભારતના ગાઢ સંબંધો છે.
