સ્વીડનમાં એક મસ્જિદની સામે કુરાન સળગાવનાર પ્રદર્શનકારી સલવાન મોમિકાનું ગોળી મારીને મોત થયું છે. સલવાને 2023 માં કુરાનની નકલો બાળી નાખી હતી, ત્યારબાદ ઘણા મુસ્લિમ દેશો દ્વારા તેની ટીકા કરવામાં આવી હતી.
રિપોર્ટ અનુસાર, હુમલાખોર સ્ટોકહોમમાં મોમિકાના ઘરમાં ઘૂસી ગયો અને તેને ગોળી મારી દીધી. હુમલા સમયે તે ટિકટોક પર લાઈવ હતો.
ઇસ્લામના વિરોધમાં કુરાન સળગાવવાના કેસમાં ઇરાકી મૂળના ખ્રિસ્તી સલવાન મોમિકા ગુરુવારે કોર્ટમાં હાજર થવાના હતા. પરંતુ તેમના મૃત્યુના સમાચાર પછી, સ્ટોકહોમ કોર્ટે સુનાવણી મુલતવી રાખી.
સ્વીડિશ કોર્ટમાં, મોમિકા અને અન્ય એક વ્યક્તિ, સલવાન નજીમ પર એક ચોક્કસ ધર્મ વિરુદ્ધ નફરત ફેલાવવાનો આરોપ મૂકવામાં આવ્યો હતો. ફરિયાદીઓએ જણાવ્યું હતું કે બે માણસોએ સ્ટોકહોમ મસ્જિદની બહાર કુરાન સળગાવી હતી અને મુસ્લિમ ધર્મ વિશે વાંધાજનક ટિપ્પણીઓ કરી હતી.
સલવાન મોમિકાએ કુરાન કેમ બાળી નાખ્યું?
સલવાન મોમિકાએ કહ્યું હતું કે તે ઇસ્લામનો વિરોધ કરવા માંગે છે અને કુરાન બાળવાની પરવાનગી માંગી હતી. આ પછી, સ્વીડિશ પોલીસે તેમને એક દિવસ માટે ઇસ્લામ વિરુદ્ધ વિરોધ કરવાની પરવાનગી આપી.
2023 માં કુરાન બાળવાની પરવાનગી મળ્યા બાદ, મોમિકાએ કહ્યું હતું કે અમે કુરાનની નકલ બાળી નાખવાના છીએ. અમે કહેવા માંગીએ છીએ, સ્વીડન, હજુ પણ સમય છે, જાગો. આ લોકશાહી છે. અમે મુસ્લિમોની વિરુદ્ધ નથી પણ તેમના વિચારો અને માન્યતાઓની વિરુદ્ધ છીએ. મુસ્લિમ ધર્મનો ખૂબ જ નકારાત્મક પ્રભાવ છે અને તેને વિશ્વભરમાં પ્રતિબંધિત કરવો જોઈએ.
