ઓસ્માનિયા યુનિવર્સિટીની જોઈન્ટ એક્શન કમિટીના સભ્યોએ રવિવારે સાંજે ફિલ્મ અભિનેતા અલ્લુ અર્જુનના ઘરે પ્રદર્શન કર્યું. આ દરમિયાન વિરોધીઓએ માંગ કરી હતી કે અભિનેતાએ મહિલાના પરિવારને 1 કરોડ રૂપિયાની સહાયની રકમ આપવી જોઈએ અને પરિવારને મદદ કરવી જોઈએ. આ દરમિયાન પોલીસે કાર્યવાહી કરીને 8 લોકોની અટકાયત કરી હતી. ઘટના સમયે અલ્લુ અર્જુન ઘરે હાજર નહોતો. પોલીસે સ્થિતિને કાબૂમાં લેવા માટે સુરક્ષા વધારી દીધી છે.
પ્રદર્શનનો એક વીડિયો પણ સામે આવ્યો છે. જેમાં વિરોધીઓ અભિનેતાના ઘરની સામે પ્રદર્શન કરી રહ્યા છે. તેઓએ અહીં ભારે હોબાળો મચાવ્યો હતો અને ઘરની બહારના ફૂલના કુંડા તોડી નાખ્યા હતા. પોસ્ટ શેર કરીને અભિનેતાએ લોકોને ગેરવર્તન ન કરવા વિનંતી કરી હતી. દરમિયાન, અલ્લુ અર્જુને ઑનલાઇન અને ઑફલાઇન બંને રીતે અપમાનજનક ભાષાનો ઉપયોગ ટાળવાની અપીલ કરી છે. અલ્લુએ તેના ચાહકોને આદર અને સકારાત્મકતા જાળવવા વિનંતી કરી હતી.
અલ્લુ અર્જુને તેના તમામ ચાહકોને અપીલ કરી અને કહ્યું કે તેઓએ હંમેશા જવાબદારીપૂર્વક પોતાની લાગણીઓ વ્યક્ત કરવી જોઈએ. નકલી ID અને નકલી પ્રોફાઇલ વડે પોતાને મારા ચાહકો તરીકે ખોટી રીતે રજૂ કરનારા અને અપમાનજનક પોસ્ટ કરનારાઓ સામે કડક કાર્યવાહી કરવામાં આવશે. તેણે આગળ લખ્યું, હું ચાહકોને વિનંતી કરું છું કે આવી પોસ્ટ્સ સાથે ન જોડાય.
ભાજપે વખોડી કાઢી
અલ્લુ અર્જુનના ઘર પર થયેલા હુમલાની ભાજપે ટીકા કરી છે. ભાજપે કોંગ્રેસની આગેવાની હેઠળની સરકાર પર આકરા પ્રહારો કર્યા છે. આંધ્ર પ્રદેશ ભાજપના ઉપાધ્યક્ષે કહ્યું કે તેલંગાણાની કોંગ્રેસ સરકારે અલ્લુ અર્જુન જેવા કલાકારને નિશાન બનાવીને ખૂબ જ શરમજનક કૃત્ય કર્યું છે. દક્ષિણ ભારતના સૌથી મોટા કલાકાર અને પ્રતિષ્ઠિત વ્યક્તિત્વ પર આ પ્રકારનો પથ્થરમારો અને ઉત્પીડન નિંદનીય અને સંપૂર્ણપણે અસ્વીકાર્ય છે.
