ખેડૂતો અને તેમની જમીનના રક્ષણ માટે દરેકને એક થવા વિનંતી કરતા, વિશ્વ વોક્કાલિગા મહાસમસ્તાન મઠના મહંત કુમાર ચંદ્રશેખરનાથ સ્વામીજીએ મંગળવારે કહ્યું કે એવો કાયદો લાવવો જોઈએ જેમાં મુસ્લિમ સમુદાયને મત આપવાનો અધિકાર ન હોય. સ્વામીજીએ કહ્યું કે એ સુનિશ્ચિત કરવું જોઈએ કે વકફ બોર્ડ ન હોય. તેમણે કહ્યું કે બીજાની જમીન છીનવી લેવી એ ‘ધર્મ’ નથી. આ નિવેદન એવા સમયે આવ્યું છે જ્યારે વકફ સંપત્તિને લઈને વિવાદ ચાલુ છે.
સ્વામીજીએ કહ્યું, ‘ખેડૂતો સાથે થઈ રહેલા અન્યાય સામે દરેકે લડવું જોઈએ… એવું કહેવાય છે કે વક્ફ બોર્ડ કોઈની પણ જમીન પર દાવો કરી શકે છે. આ એક મોટો અન્યાય છે… બીજાની જમીન છીનવી લેવી એ ધર્મ નથી… તેથી ખેડૂતોની જમીન તેમની પાસે રહે તે માટે દરેકે લડવું જોઈએ.’
બેંગલુરુમાં ભારતીય કિસાન સંઘ દ્વારા આયોજિત એક વિરોધ સભાને સંબોધતા, તેમણે કહ્યું, ‘ખેડૂતો ખોરાક પ્રદાતા છે, તેથી તેમને સુરક્ષિત અને પ્રોત્સાહન આપવું જોઈએ, અને એ સુનિશ્ચિત કરવું જોઈએ કે કોઈ તેમની જમીન અને મિલકત છીનવી ન લે.’
સ્વામીજીએ દાવો કર્યો, ‘દરેક વ્યક્તિએ ખાતરી કરવી જોઈએ કે ત્યાં કોઈ વકફ બોર્ડ નથી… કારણ કે નેતાઓ મત માટે કામ કરે છે. એવો કાયદો લાવવો જોઈએ જેમાં મુસ્લિમ સમુદાયને મત આપવાનો અધિકાર ન હોય… આ ચોક્કસપણે થવું જોઈએ. પાકિસ્તાનમાં, તેઓએ આ કર્યું છે, ત્યાં અન્યને મત આપવાનો અધિકાર નથી.
તેમણે કહ્યું, ‘તે જ રીતે, ભારતમાં પણ, જો આપણે એ સુનિશ્ચિત કરીએ કે તેમને (મુસ્લિમો)ને મત આપવાનો અધિકાર નથી, તો તેઓ પોતાના સુધી (મર્યાદિત) રહેશે અને દરેક વ્યક્તિ શાંતિથી રહી શકશે.’
કર્ણાટકના ભાગોમાં ખેડૂતોના એક વર્ગ અને અન્ય લોકોએ આક્ષેપ કર્યો છે કે તેમની જમીનો વકફ મિલકત તરીકે ચિહ્નિત કરવામાં આવી છે, જેનો વિવિધ ખેડૂત જૂથો, સંગઠનો અને વિરોધ પક્ષ ભાજપ દ્વારા વિરોધ કરવામાં આવ્યો છે.
