કેરળના તિરુવનંતપુરમની ફાસ્ટ ટ્રેક કોર્ટે મંગળવારે એક શિક્ષકને પાંચ વર્ષ પહેલા ધોરણ 11ની વિદ્યાર્થીનીને લલચાવીને બળાત્કાર કરવા બદલ 111 વર્ષની સખત કેદની સજા ફટકારી છે. તેના પર 1.5 લાખ રૂપિયાનો દંડ પણ ફટકારવામાં આવ્યો છે. કોર્ટના આદેશ અનુસાર, જો દોષિત મનોજ દંડ ભરવામાં અસમર્થ હોય તો તેને વધુ એક વર્ષની કેદની સજા ભોગવવી પડશે. મનોજની પત્નીએ આત્મહત્યા કરી લીધી જ્યારે તેને ખબર પડી કે તેના પતિએ સગીર પર બળાત્કાર કર્યો છે. આ ઘટના 2 જુલાઈ, 2019 ના રોજ બની હતી.
બળાત્કાર બાદ અભદ્ર તસવીરો લેવામાં આવી હતી
જજ આર.રેખાએ આ ગંભીર મામલામાં ચુકાદો આપતાં કહ્યું કે મનોજ પર કોઈ દયા ન દાખવી શકાય. ફરિયાદ પક્ષ અનુસાર, દોષિત મનોજ સરકારી કર્મચારી છે અને તે પોતાના ઘરે ‘ટ્યુશન’ ભણાવતો હતો. મનોજે વિદ્યાર્થિનીને સ્પેશિયલ ક્લાસના બહાને પોતાના ઘરે બોલાવી હતી અને તેના પર બળાત્કાર કર્યો હતો. આટલું જ નહીં તેણે તેના મોબાઈલમાંથી વિદ્યાર્થીનીની વાંધાજનક તસવીરો પણ લીધી હતી.
બળાત્કારની ઘટના બાદ યુવતી ખૂબ જ ડરી ગઈ હતી અને તેણે ટ્યુશન આવવાનું બંધ કરી દીધું હતું. આ પછી આરોપીએ પાછળથી આ તસવીરો વાયરલ કરી હતી. ઘટના સામે આવ્યા બાદ પીડિતાના પરિવારે આ મામલે ફરિયાદ નોંધાવી હતી. જે બાદ પોલીસે મનોજની ધરપકડ કરી અને તેનો ફોન જપ્ત કરીને તેને ફોરેન્સિક તપાસ માટે મોકલી આપ્યો, ત્યારબાદ ફોનમાં સગીર પીડિતાની વાંધાજનક તસવીરો મળી આવી.
તેના બચાવમાં, મનોજે દાવો કર્યો હતો કે તે ઘટનાના દિવસે ઓફિસમાં હતો અને તેણે સહી સાથે નોંધાયેલ રજાનો રેકોર્ડ પણ રજૂ કર્યો હતો. જોકે, ફરિયાદ પક્ષે રજૂ કરેલા આરોપીના ફોનના કોલ રેકોર્ડ પરથી જાણવા મળ્યું હતું કે ઘટનાના દિવસે મનોજ ટ્યુશન ભણાવતો હતો.
