કર્ણાટક કેબિનેટે કર્ણાટક ટ્રાન્સપરન્સી ઇન પબ્લિક પ્રોક્યોરમેન્ટ (KTPP) એક્ટમાં સુધારાને મંજૂરી આપી છે. એજન્સીના જણાવ્યા અનુસાર, આ કાયદામાં સુધારો કરીને, મુસ્લિમ કોન્ટ્રાક્ટરોને કોન્ટ્રાક્ટમાં ચાર ટકા અનામત આપવામાં આવશે. શુક્રવારે સીએમ સિદ્ધારમૈયાની અધ્યક્ષતામાં યોજાયેલી બેઠકમાં આ નિર્ણયને મંજૂરી આપવામાં આવી છે. આ સુધારા બિલ વર્તમાન વિધાનસભા સત્રમાં જ રજૂ કરી શકાય છે. આ પહેલા ૭ માર્ચે સિદ્ધારમૈયાએ પણ કહ્યું હતું કે સરકારી કોન્ટ્રાક્ટના ૪ ટકા મુસ્લિમો માટે અનામત રાખવામાં આવશે.
સિદ્ધારમૈયા કેબિનેટના આ નિર્ણય પર ભાજપે આકરા પ્રહારો કર્યા છે. ભાજપે કર્ણાટક સરકારના બજેટને ઔરંગઝેબથી પ્રેરિત જાહેર કર્યું હતું. સૂત્રોના જણાવ્યા અનુસાર, કેબિનેટે હેબ્બલમાં કૃષિ વિભાગની 4.24 એકર જમીન બે વર્ષ માટે ભાડામુક્ત ધોરણે ઇન્ટરનેશનલ ફ્લાવર ઓક્શન બેંગલુરુ (IFAB) ને આપવાના પ્રસ્તાવ પર પણ ચર્ચા કરી. જાન્યુઆરીમાં લાગેલી આગની ઘટના બાદ ‘બેંગલુરુ બાયોઇનોવેશન સેન્ટર’માં પુનઃનિર્માણ અને સાધનો બદલવા માટે 96.77 કરોડ રૂપિયાની નાણાકીય સહાયને મંજૂરી આપવાની પણ ચર્ચા કરવામાં આવી હતી.
સૂત્રોએ જણાવ્યું હતું કે કેબિનેટે કર્ણાટક પબ્લિક સર્વિસ કમિશન (KPSC) માં સુધારા માટેના પગલાં અંગે ચર્ચા કરી હતી. તેમણે કહ્યું કે KPSC માં સુધારો લાવવા માટે પગલાં સૂચવવા માટે એક નિષ્ણાત સમિતિની રચના કરવાનો અને KPSC સભ્યોની નિમણૂક માટે એક શોધ સમિતિની રચના કરવાનો નિર્ણય લેવામાં આવ્યો છે.
કર્ણાટકમાં બજેટ પછી તરત જ ભાજપે કહ્યું હતું કે આ તુષ્ટિકરણનું ઉદાહરણ છે. વકફ મિલકતોના સમારકામ, માળખાગત સુવિધાઓ અને મુસ્લિમ કબ્રસ્તાનોના સંરક્ષણ માટે 150 કરોડ રૂપિયા ફાળવવાના પ્રસ્તાવ પર ભાજપ નેતાએ કોંગ્રેસ પર પ્રહાર કરતા કહ્યું કે કર્ણાટક સરકાર એવા સમયે આ પ્રસ્તાવ લઈને આવી છે જ્યારે કેન્દ્ર સરકાર વકફ કાયદામાં સુધારો કરવા માટે સંસદમાં એક બિલ રજૂ કરવાની તૈયારીમાં છે.
તેમણે કહ્યું કે કર્ણાટક સરકારે આ શીર્ષક હેઠળ ભંડોળ ફાળવવાનો પ્રસ્તાવ એવા સમયે મૂક્યો છે જ્યારે કુલ એક લાખ એકર જમીનમાંથી લગભગ 85,000 એકર જમીન અતિક્રમણના આરોપોને કારણે વિવાદિત છે. તેમણે કહ્યું, ‘આટલું બધું તુષ્ટિકરણ શા માટે?’ શું કર્ણાટકમાં લઘુમતી સમુદાયનો અર્થ ફક્ત મુસ્લિમો છે?
