7 વર્ષની કામ્યા કાર્તિકેયને સાત ખંડોના સૌથી ઊંચા શિખરો સર કરનાર વિશ્વની સૌથી નાની વયની મહિલા પર્વતારોહક બનીને ઈતિહાસ રચ્યો છે. ઈન્ડિયન નેવલ ચિલ્ડ્રન્સ સ્કૂલ (મુંબઈ) ના ધોરણ 12 ની વિદ્યાર્થીની કામ્યાએ 24 ડિસેમ્બર 2024 ના રોજ ચિલી માનક સમય મુજબ સાંજે 5:20 વાગ્યે એન્ટાર્કટિકાના માઉન્ટ વિન્સન શિખર પર વિજય મેળવીને આ ઐતિહાસિક સિદ્ધિ પૂર્ણ કરી.
કામ્યા કાર્તિકેયન
કામ્યાની આ અદ્ભુત યાત્રામાં તેના પિતા ભારતીય નૌકાદળના કમાન્ડર એસ. કાર્તિકેયન પણ સામેલ હતા. બંનેએ એન્ટાર્કટિકાના આ 16,050 ફૂટ ઊંચા શિખર પર વિજય મેળવીને એક નવો દાખલો બેસાડ્યો છે. કામ્યાએ આ સાહસિક સફર 13 વર્ષની ઉંમરે શરૂ કરી હતી. તેમની આ યાત્રા હિંમત, નિશ્ચય અને જુસ્સાનું ઉદાહરણ છે.
કામ્યાની આ સિદ્ધિમાં સમાવિષ્ટ શિખરો છે:
• માઉન્ટ કિલિમાંજારો (આફ્રિકા)
• માઉન્ટ એલ્બ્રસ (યુરોપ)
• માઉન્ટ કોસિયુઝ્કો (ઓસ્ટ્રેલિયા)
• માઉન્ટ એકોન્કાગુઆ (દક્ષિણ અમેરિકા)
• માઉન્ટ ડેનાલી (ઉત્તર અમેરિકા)
• માઉન્ટ એવરેસ્ટ (એશિયા)
• માઉન્ટ વિન્સન (એન્ટાર્કટિકા)
ભારત અને નૌકાદળ માટે ગર્વની ક્ષણ
ભારતીય નૌકાદળે આ ઐતિહાસિક સિદ્ધિ બદલ કામ્યા અને તેના પિતાને અભિનંદન પાઠવ્યા હતા. તેને “ઐતિહાસિક સિદ્ધિ” ગણાવતા, નૌકાદળે કહ્યું કે તે ભારતીય યુવાનોની અપાર ક્ષમતા અને હિંમત દર્શાવે છે. સૌથી પહેલા માઉન્ટ એવરેસ્ટ પર વિજય મેળવનારી કામ્યા હવે વિશ્વભરના યુવા પર્વતારોહકો માટે પ્રેરણા બની ગઈ છે. તેમની સફળતા પાછળ તેમના પરિવાર, શાળા અને ભારતીય નૌકાદળનું વિશેષ યોગદાન રહ્યું છે.
યુવાનો માટે પ્રેરણાનો સંદેશ
કામ્યાએ તેની સિદ્ધિ વિશ્વભરના સ્વપ્નદ્રષ્ટા યુવાનોને સમર્પિત કરી. તેણે કહ્યું, “દરેક શિખરે મને હિંમત, ધૈર્ય અને આપણા ગ્રહની સુંદરતા વિશે કંઈક નવું શીખવ્યું. હું ઈચ્છું છું કે મારી આ સફર અન્ય યુવાનોને તેમના સપના પૂરા કરવા માટે પ્રેરણા આપે, પછી ભલે તે સપના કેટલા ઊંચા હોય.” કામ્યા કાર્તિકેયનની આ ઐતિહાસિક જીત ઉંમરના અવરોધોને તોડી નાખે છે અને સાબિત કરે છે કે જો જુસ્સો અને સમર્પણ હોય તો કોઈ સ્વપ્ન અસંભવ નથી. જ્યારે તેઓ ઘરે પરત ફરશે ત્યારે દેશ તેમનું ભવ્ય સ્વાગત કરશે અને તેમની વાર્તા ભવિષ્યની પેઢીઓને પ્રેરણા આપતી રહેશે.
