નેશનલ કોન્ફરન્સ બહુમત તરફ આગળ વધી રહી હોય તેવું લાગી રહ્યું છે. દરમિયાન નેશનલ કોન્ફરન્સના પ્રમુખ ફારૂક અબ્દુલ્લાએ જાહેરાત કરી છે કે તેમના પુત્ર ઓમર અબ્દુલ્લા જમ્મુ-કાશ્મીરના સીએમ બનશે. ઓમર અબ્દુલ્લાએ આ ચૂંટણીમાં બે સીટો બડગામ અને ગાંદરબલ પરથી ઉમેદવારી નોંધાવી હતી. તેઓ બડગામથી ચૂંટણી જીત્યા છે જ્યારે તેઓ ગાંદરબલ સીટ પર આગળ છે.
ફારુક અબ્દુલ્લાએ કહ્યું, “અમે આશા રાખીએ છીએ કે અમે લોકોની અપેક્ષાઓ પર ખરા ઉતરીશું અને તેમની સમસ્યાઓનું નિરાકરણ લાવીશું. હું માનું છું કે લોકોએ અમારી વાત સાંભળી છે અને અમારા પર વિશ્વાસ કર્યો છે, હું તેમનો આભારી છું. દબાણનો અંત લાવવો પડશે. અહીં જાહેર શાસન હોય, પોલીસ શાસન નહીં.
નિર્દોષ લોકોને જેલમાંથી છોડાવીશું – ફારૂક
અબ્દુલ્લાએ વધુમાં કહ્યું કે, “આપણે નિર્દોષ લોકોને જેલમાંથી બહાર કાઢવાના છે, જે મીડિયાના લોકોને સત્ય બોલવા માટે જેલમાં છે તેમને બહાર કાઢવાના છે, એક જ વિનંતી છે કે આપણે નફરત ન વધારવી જોઈએ, પ્રેમ વધારવો જોઈએ.” આપણે હિંદુ અને મુસ્લિમો વચ્ચે ભાઈચારો વધારવો પડશે.”
ગાંદરબલ સીટ પર પરિણામની રાહ જોવાઈ રહી છે
જો ઓમર અબ્દુલ્લા સીએમ બનશે તો તેમના સમર્થકો માટે ખૂબ જ ખુશીની વાત હશે કારણ કે ઓમરે એક સમયે ચૂંટણી ન લડવાનો નિર્ણય લીધો હતો. ઓમરે કહ્યું હતું કે જ્યાં સુધી જમ્મુ-કાશ્મીરને પૂર્ણ રાજ્યનો દરજ્જો નહીં મળે ત્યાં સુધી તેઓ ચૂંટણી નહીં લડે. જોકે, ચૂંટણીની તારીખોની જાહેરાત બાદ તેમનો સૂર બદલાયો અને તેમણે પોતાનો નિર્ણય બદલી નાખ્યો. એટલું જ નહીં તેઓ બે-બે બેઠક પરથી ચૂંટણી લડ્યા હતા.
ચૂંટણી પંચની વેબસાઈટ પર બપોરે 2 વાગ્યા સુધીના આંકડા મુજબ નેશનલ કોન્ફરન્સે 8 બેઠકો પર ચૂંટણી જીતી છે જ્યારે તેની સહયોગી કોંગ્રેસે પણ એક બેઠક જીતી છે. નેશનલ કોન્ફરન્સ 33 સીટો પર અને કોંગ્રેસ 5 સીટો પર આગળ ચાલી રહી છે. જ્યાં એક તરફ મતગણતરી ચાલી રહી છે તો બીજી તરફ ઓમર અબ્દુલ્લાએ એક્ઝિટ પોલ પર સવાલો ઉઠાવ્યા છે.
