ઈન્ડિગોની દિલ્હી-જેદ્દાહ ફ્લાઈટ (6E 63) શુક્રવારે મોડી રાત્રે કરાચી ડાયવર્ટ કરવામાં આવી હતી. કહેવામાં આવી રહ્યું છે કે મેડિકલ ઈમરજન્સીના કારણે પ્લેનને પાકિસ્તાનમાં લેન્ડ કરવામાં આવ્યું હતું. પ્લેન 13 ડિસેમ્બરે રાત્રે 9.15 વાગ્યે દિલ્હીથી ટેકઓફ થયું હતું અને 11 વાગ્યે કરાચીમાં લેન્ડ થયું હતું. ફ્લાઇટ ટ્રેકિંગ સાઇટ દર્શાવે છે કે ત્રણ કલાક પછી, શનિવારે સવારે લગભગ 1.55 વાગ્યે, એરબસ A321 કરાચીથી ઉપડ્યું અને 3.54 વાગ્યે દિલ્હી પરત ફર્યું.
પાક મીડિયાએ સૂત્રોને ટાંકીને જણાવ્યું હતું કે 55 વર્ષીય પુરુષ મુસાફર પાકિસ્તાની એરસ્પેસમાં ગંભીર રીતે બીમાર પડ્યો હતો. વ્યક્તિની હાલત જોઈને ઈન્ડિગો ફ્લાઈટના ક્રૂએ પેસેન્જરને ઓક્સિજન પુરો પાડ્યો પરંતુ તેની હાલતમાં કોઈ સુધારો થયો નહીં, બલ્કે તે વધુ ખરાબ થઈ ગયો. માનવતાના આધાર પર નિર્ણય લેતા, પાઇલટે કરાચી એર ટ્રાફિક કંટ્રોલનો સંપર્ક કર્યો અને ઇમરજન્સી લેન્ડિંગ માટે પરવાનગી માંગી. કરાચી એર ટ્રાફિક કંટ્રોલ તરફથી મંજૂરી મળ્યા બાદ પ્લેનને કરાચી તરફ વાળવામાં આવ્યું હતું.
પાકિસ્તાન સિવિલ એવિએશન ઓથોરિટીની એક મેડિકલ ટીમ તરત જ પ્લેનમાં ચડી ગઈ અને પેસેન્જરને મેડિકલ સુવિધાઓ પૂરી પાડી, જેના કારણે તેની હાલત સ્થિર થઈ ગઈ. પાકિસ્તાની મીડિયા અનુસાર, ત્યાંથી પેસેન્જરને દવાઓ પણ આપવામાં આવી છે. જિયો ન્યૂઝે એરપોર્ટના સૂત્રોને ટાંકીને જણાવ્યું હતું કે સ્થિતિ સ્થિર થયા બાદ વિમાને કરાચીથી ટેકઓફ કર્યું હતું અને જેદ્દાહ જવાને બદલે દિલ્હી પરત ફર્યું હતું.
