ક્રિકેટર મોહમ્મદ અઝહરુદ્દીન મુશ્કેલીમાં હોય તેવું લાગી રહ્યું છે. એન્ફોર્સમેન્ટ ડિરેક્ટોરેટ (ED) એ મની લોન્ડરિંગ કેસમાં મોહમ્મદ અઝહરુદ્દીનને સમન્સ જારી કર્યું છે. ક્રિકેટર મોહમ્મદ અઝહરુદ્દીન પર હૈદરાબાદ ક્રિકેટ એસોસિએશનના ફંડના દુરુપયોગનો આરોપ છે. મળતી માહિતી મુજબ આ મામલો 20 કરોડ રૂપિયાની ઉચાપતનો કહેવાય છે. પૂર્વ ભારતીય કેપ્ટન અઝહરુદ્દીન ગુરુવારે ED સમક્ષ હાજર થવાનો છે.
મળતી માહિતી મુજબ, EDએ હૈદરાબાદ ક્રિકેટ એસોસિએશનના અધિકારીઓ વિરુદ્ધ મની લોન્ડરિંગનો કેસ નોંધ્યો હતો. EDએ તેલંગાણામાં 9 સ્થળો પર દરોડા પાડ્યા હતા અને ઘણા મહત્વપૂર્ણ દસ્તાવેજો અને ડિજિટલ ઉપકરણો જપ્ત કર્યા હતા. એન્ફોર્સમેન્ટ ડિરેક્ટોરેટના જણાવ્યા અનુસાર, હૈદરાબાદ ક્રિકેટ એસોસિએશનના અધિકારીઓએ રાજીવ ગાંધી ક્રિકેટ સ્ટેડિયમના નિર્માણમાં નાણાકીય ગેરરીતિ આચરી હતી. તેઓએ ખાનગી કંપનીઓને ઊંચા દરે કોન્ટ્રાક્ટ આપ્યા અને એસોસિએશનને કરોડો રૂપિયાનું નુકસાન પહોંચાડ્યું. EDએ આ મામલામાં ત્રણ FIR નોંધી છે અને વધુ તપાસ ચાલી રહી છે.
મેચ ફિક્સિંગમાં નામ આવ્યા બાદ ક્રિકેટ કારકિર્દી ખતમ થઈ ગઈ
તમને જણાવી દઈએ કે, ક્રિકેટરમાંથી રાજનેતા બનેલા મોહમ્મદ અઝહરુદ્દીન 2009માં કોંગ્રેસની ટિકિટ પર યુપીના મુરાદાબાદથી સાંસદ રહી ચૂક્યા છે.તેમણે રાજસ્થાનથી 2014ની લોકસભા ચૂંટણી લડી હતી પરંતુ ચૂંટણી હારી ગયા હતા. 2018 માં, તેમને તેલંગાણા પ્રદેશ કોંગ્રેસ સમિતિના અધ્યક્ષ તરીકે નિયુક્ત કરવામાં આવ્યા હતા. મોહમ્મદ અઝહરુદ્દીન ટીમ ઈન્ડિયાનો મજબૂત બેટ્સમેન રહ્યો છે. તેની ગણતરી ટીમ ઈન્ડિયાના સૌથી સફળ કેપ્ટનોમાં થાય છે. વર્ષ 2000માં મેચ ફિક્સિંગમાં તેનું નામ આવ્યા બાદ તેની ક્રિકેટર કારકિર્દીનો અંત આવ્યો હતો.
આ પણ વાંચો – યોગી સરકારની મોટી ભેટ, દિવાળી પર મળશે ફ્રી LPG સિલિન્ડર!
