દંતેવાડા નક્સલ એન્કાઉન્ટરઃ છત્તીસગઢના દંતેવાડામાં નક્સલવાદીઓ અને સુરક્ષા દળો વચ્ચે એન્કાઉન્ટર થયું છે. અત્યાર સુધીમાં 12 વર્દીધારી નક્સલવાદીઓ માર્યા ગયા છે. વચ્ચે-વચ્ચે ગોળીબાર થઈ રહ્યો છે. સૂત્રોના જણાવ્યા અનુસાર STF અને CRPFની સંયુક્ત ટીમ પેટ્રોલિંગમાં હતી. જેના પર છુપાયેલા નક્સલીઓએ ગોળીબાર કર્યો હતો. જે બાદ સુરક્ષા દળોએ જવાબી કાર્યવાહી કરી હતી. આ પહેલા સુરક્ષા દળોએ દંતેવાડા, નારાયણપુર, કોંડાગાંવ અને જગદલપુર જિલ્લામાં સર્ચ ઓપરેશન શરૂ કર્યું હતું. આ પછી દળ દક્ષિણ અબુઝમાદ વિસ્તારમાં પેટ્રોલિંગ માટે રવાના થઈ ગયું. નક્સલીઓને ગોળીબારનો જડબાતોડ જવાબ આપવામાં આવી રહ્યો છે.
આ વિસ્તારમાં 40-50 નક્સલવાદીઓ છુપાયા હોવાની માહિતી ફોર્સને મળી હતી. ગુરુવારે સવારે 3 વાગ્યાથી ફાયરિંગ ચાલુ છે. એન્કાઉન્ટરમાં નક્સલવાદીઓના મોટા કેડરના માર્યા ગયાની માહિતી પણ સામે આવી છે. તમને જણાવી દઈએ કે કેન્દ્રીય ગૃહમંત્રી અમિત શાહે ઓગસ્ટ મહિનામાં જાહેરાત કરી હતી કે 2026 સુધીમાં દેશમાંથી નક્સલવાદની સમસ્યા ખતમ થઈ જશે. આવનારા સમયમાં નક્સલવાદીઓનો સફાયો કરવામાં આવશે. શાહે સમીક્ષા બેઠક દરમિયાન છત્તીસગઢ અને આસપાસના રાજ્યોના મુખ્ય સચિવો સાથે ચર્ચા કરી હતી.
207 મોટા નક્સલવાદીઓનો ખાત્મો
ગૃહમંત્રીની જાહેરાત બાદ અત્યાર સુધીમાં સુરક્ષાદળો અને નક્સલવાદીઓ વચ્ચે 96 એન્કાઉન્ટર થયા છે. પોલીસે લગભગ 207 નક્સલીઓનો ખાત્મો કર્યો છે. તેના પર લગભગ 9 કરોડ રૂપિયાનું ઈનામ હતું. એક દિવસ પહેલા બીજાપુરમાં સુરક્ષાદળો અને નક્સલવાદીઓ વચ્ચે અથડામણ થઈ હતી. જેમાં એક વર્દીધારી નક્સલી માર્યો ગયો હતો. નક્સલીઓએ IED બ્લાસ્ટ કર્યો હતો. જેમાં 2 જવાનો ઘાયલ થયા હતા. ગંગાલુર પોલીસ સ્ટેશનના મુંગા વિસ્તારના જંગલમાં એન્કાઉન્ટર બાદ નક્સલવાદીઓ ભાગી ગયા હતા. છેલ્લા એક સપ્તાહમાં ઝારખંડ અને છત્તીસગઢમાં નક્સલવાદીઓએ બાતમીદારો હોવાની આશંકાથી લગભગ 5 લોકોની હત્યા કરી છે.
