પાંડા ખુશખુશાલ અને રસપ્રદ પ્રાણીઓ છે, જે ખાસ કરીને ચીનમાં જોવા મળે છે. તાજેતરમાં, સરકારે 76 લાખ રૂપિયા ખર્ચ્યા અને બે પાંડાના નામ માટે એક હરીફાઈનું આયોજન કર્યું, પરંતુ તેનો કોઈ ફાયદો થયો નહીં કારણ કે તેઓને એ જ જૂના નામોથી બોલાવવામાં આવે છે. ચાલો તેના વિશે જાણીએ.
લાખોની કિંમતની સ્પર્ધા
ચીને આ વર્ષની શરૂઆતમાં હોંગકોંગના અધિકારીઓને બે વિશાળ પાંડા ભેટમાં આપ્યા હતા. તેમનું નામ બદલવા માટે એક સ્પર્ધાનું આયોજન કરવામાં આવ્યું હતું, જેના પર રૂ. 76 લાખ ($90,028) ખર્ચવામાં આવ્યા હતા. જો કે આટલી મોટી રકમ ખર્ચવા છતાં તેમનું મૂળ નામ યથાવત રાખવામાં આવ્યું હતું.
સાઉથ ચાઇના મોર્નિંગ પોસ્ટના અહેવાલમાં જણાવાયું છે કે ઓક્ટોબરમાં એક વિશાળ પાંડા નામ બદલવાની સ્પર્ધા શરૂ કરવામાં આવી હતી, જ્યાં લોકોને સિચુઆનના બે પાંડા ‘એન એન’ અને ‘કે કે’ માટે નવા નામ સૂચવવા માટે આમંત્રણ આપવામાં આવ્યું હતું.
પૈસા ક્યાં ગયા?
રિપોર્ટમાં એમ પણ કહેવામાં આવ્યું છે કે આ નાણાં આ પ્રવૃત્તિ માટે વેબસાઇટ બનાવવા, સ્ટાફની ભરતી કરવા, ઇન્ટરનેટ પર જાહેરાતો પોસ્ટ કરવા અને હોંગકોંગના માસ ટ્રાન્ઝિટ રેલવે (MTR) સ્ટેશનો પર તેમજ વિજેતાઓને ઇનામ આપવા પાછળ ખર્ચવામાં આવ્યા હતા. આ સ્પર્ધાના વિજેતાને 5.16 લાખ રૂપિયાનું ઇનામ આપવામાં આવ્યું હતું. જેમાં ટુરબિલન વોચ, ઓશન પાર્ક મેમ્બરશિપ અને રૂ. 4 લાખના વાઉચર્સનો સમાવેશ થાય છે.
પુરસ્કાર હોવા છતાં, ન્યાયાધીશોએ જાહેરાત કરી કે પાંડાના મૂળ નામો યથાવત રાખવામાં આવશે. નાણાની બગાડ વિશે પૂછવામાં આવતા, સંસ્કૃતિ, રમતગમત અને પ્રવાસન સચિવ રોઝાના લો શુક-પુઇએ કહ્યું કે અધિકારીઓને ખ્યાલ નહોતો કે લોકો મૂળ નામ રાખવાનું પસંદ કરશે. પુરુષ ‘આન આન’ અને સ્ત્રી ‘કે કે’ 5 વર્ષની છે અને સપ્ટેમ્બરમાં ખૂબ જ ધામધૂમથી દેશમાં લાવવામાં આવ્યા હતા.
