ગૂગલ ટૂંક સમયમાં જીમેલ માટે એસએમએસ-આધારિત ટુ-ફેક્ટર ઓથેન્ટિકેશન (2FA) બંધ કરવા જઈ રહ્યું છે. એક રિપોર્ટ અનુસાર, કંપની હવે SMS કોડને બદલે ક્વિક રિસ્પોન્સ (QR) કોડ રજૂ કરવા જઈ રહી છે. આ ફેરફારનો હેતુ ગૂગલ એકાઉન્ટ્સની સુરક્ષા વધારવાનો છે, કારણ કે સાયબર ગુનેગારો વપરાશકર્તાઓને તેમના SMS લોગિન કોડ શેર કરવા માટે છેતરપિંડી કરી શકે છે. SMS-આધારિત 2FA સિસ્ટમ, જૂની થઈ ગઈ હોવા છતાં, હજુ પણ ઘણા પ્લેટફોર્મ પર સપોર્ટેડ છે.
Gmail માં 2FA માટે QR કોડનો ઉપયોગ
ફોર્બ્સના અહેવાલ મુજબ, ગૂગલ આગામી મહિનાઓમાં SMS કોડની જગ્યાએ QR કોડ લાગુ કરશે. અત્યાર સુધી, ગૂગલ જ્યારે પણ કોઈ વપરાશકર્તા તેના એકાઉન્ટમાં લોગ ઇન કરે છે ત્યારે SMS દ્વારા 6-અંકનો કોડ મોકલતો હતો, જે સાચો પાસવર્ડ દાખલ કર્યા પછી ઇનપુટ કરવાનો હતો. આ ગુગલની પહેલી 2FA સિસ્ટમ હતી, જે 2011 માં રજૂ કરવામાં આવી હતી, જોકે, પછીના વર્ષોમાં વધુ સુરક્ષિત વિકલ્પો ઉમેરવામાં આવ્યા છે.
જ્યારે ગૂગલ SMS-આધારિત 2FA દૂર કરશે, ત્યારે Gmail વપરાશકર્તાઓને એક QR કોડ બતાવવામાં આવશે જેને સ્માર્ટફોનની કેમેરા એપ્લિકેશનથી સ્કેન કરવાની જરૂર પડશે. કંપની માને છે કે આ પદ્ધતિ વપરાશકર્તાઓની ઓળખ ચકાસવા માટે વધુ સુરક્ષિત રીત હશે, જે SMS-આધારિત હુમલાઓને અટકાવશે.
SMS-આધારિત 2FA દ્વારા ઉભા થતા જોખમોને ઘટાડવાનો પ્રયાસ
ગુગલના પ્રવક્તા રોસ રિચેન્ડ્રોફરે આ ફેરફાર વિશે જણાવ્યું હતું કે, “SMS કોડ વપરાશકર્તાઓ માટે નોંધપાત્ર જોખમ ઊભું કરે છે. અમે હુમલાખોરો માટેની શક્યતાઓને મર્યાદિત કરવા અને વપરાશકર્તાઓને સુરક્ષિત રાખવા માટે એક નવી અને સલામત રીત રજૂ કરી રહ્યા છીએ.”
