ભૂતપૂર્વ દિગ્ગજોની મોટી આગાહી, આ ટીમને ટાઇટલની દાવેદાર ગણાવી

ચેમ્પિયન્સ ટ્રોફી 2025 શરૂ થવામાં હવે બે દિવસ બાકી છે. આ ટુર્નામેન્ટમાં 8 ટીમો ભાગ લઈ રહી છે, અને બધી ટીમો તેના માટે તૈયાર છે. પહેલી મેચ પાકિસ્તાન અને ન્યુઝીલેન્ડ વચ્ચે ૧૯ ફેબ્રુઆરીએ કરાચીમાં રમાશે. આ વખતે મોટાભાગની ટીમોને ચેમ્પિયન્સ ટ્રોફીમાં તેમના ઘણા શ્રેષ્ઠ ખેલાડીઓની ખોટ સાલશે. ઓસ્ટ્રેલિયા, ભારત, દક્ષિણ આફ્રિકા, પાકિસ્તાન અને ન્યુઝીલેન્ડની ટીમો તેમના ખેલાડીઓની ઇજાઓથી પીડાઈ રહી છે. ઈજાના કારણે ટીમ ઈન્ડિયાનો સ્ટાર ફાસ્ટ બોલર જસપ્રીત બુમરાહ ચેમ્પિયન્સ ટ્રોફી રમી શકશે નહીં. હવે, ઓસ્ટ્રેલિયાના ભૂતપૂર્વ કેપ્ટન માઈકલ ક્લાર્કે આ વખતે ચેમ્પિયન્સ ટ્રોફીનો ખિતાબ કઈ ટીમ જીતી શકે છે તે અંગે મોટી આગાહી કરી છે.

આ ટીમ ટાઇટલ માટે પ્રબળ દાવેદાર

ઓસ્ટ્રેલિયાના ભૂતપૂર્વ કેપ્ટન માઈકલ ક્લાર્કે બિયોન્ડ23 ક્રિકેટ પોડકાસ્ટ પર વાત કરતા કહ્યું કે, “ટીમ ઈન્ડિયાને જસપ્રીત બુમરાહની ખોટ સાલશે, પરંતુ તેમ છતાં ટીમ ઈન્ડિયા ખૂબ જ મજબૂત દેખાય છે.” ટીમ ઈન્ડિયા જસપ્રીત બુમરાહ વિના પણ જીતી શકે છે. મેં ટીમ ઈન્ડિયાને ટોપ-૪માં સ્થાન આપ્યું છે. શુભમન ગિલ અને રોહિત શર્મા સારા ફોર્મમાં છે, રોહિતે થોડી મેચ પહેલા સદી ફટકારી છે અને મારું માનવું છે કે ટીમ ઈન્ડિયા ચેમ્પિયન્સ ટ્રોફી જીતવાનો મજબૂત દાવેદાર છે.

ટીમ ઈન્ડિયાનો એક્સ-ફેક્ટર કોણ હશે?

ચેમ્પિયન્સ ટ્રોફીમાં, બધાની નજર ફરી એકવાર રોહિત શર્મા અને વિરાટ કોહલી જેવા સ્ટાર ખેલાડીઓ પર રહેશે, પરંતુ એક ખેલાડી એવો છે જેને માઈક ક્લાર્ક ટીમ ઈન્ડિયાનો એક્સ-ફેક્ટર માને છે. ક્લાર્ક કહે છે કે હાર્દિક પંડ્યા ટીમનો ખતરનાક ખેલાડી છે, તે આ ટુર્નામેન્ટમાં મહત્વપૂર્ણ ભૂમિકા ભજવી શકે છે. ચેમ્પિયન્સ ટ્રોફીમાં હાર્દિક ટીમ માટે એક્સ-ફેક્ટર સાબિત થઈ શકે છે.

રિકી પોન્ટિંગે પણ ટીમ ઈન્ડિયાની તાકાતનો સ્વીકાર કર્યો

ઓસ્ટ્રેલિયાના અન્ય ભૂતપૂર્વ કેપ્ટન રિકી પોન્ટિંગે પણ ટીમ ઈન્ડિયાની તાકાતનો સ્વીકાર કર્યો છે. પોન્ટિંગે ટીમ ઈન્ડિયાને ચેમ્પિયન્સ ટ્રોફીની ફાઇનલ રમવા માટે મજબૂત દાવેદાર ગણાવી છે. પોન્ટિંગ માને છે કે ચેમ્પિયન્સ ટ્રોફીની ફાઇનલ ભારત અને ઓસ્ટ્રેલિયા વચ્ચે થવાની શક્યતા છે.