ભારત અને ઓસ્ટ્રેલિયા વચ્ચે ટેસ્ટ શ્રેણીની ત્રીજી મેચ ગાબામાં રમાઈ રહી છે. આ મેચમાં ટીમ ઈન્ડિયાના ફાસ્ટ બોલર જસપ્રીત બુમરાહનું શાનદાર પ્રદર્શન જોવા મળી રહ્યું છે. જસપ્રીત બુમરાહે પાંચમા દિવસે માર્નસ લાબુશેનની વિકેટ લઈને ઓસ્ટ્રેલિયાની ધરતી પર ઈતિહાસ રચ્યો છે. હવે બુમરાહે ટીમ ઈન્ડિયાના પૂર્વ દિગ્ગજ કેપ્ટન કપિલ દેવને હરાવ્યો છે.
ઓસ્ટ્રેલિયામાં સૌથી વધુ વિકેટ
બોર્ડર ગાવસ્કર ટ્રોફીમાં જસપ્રીત બુમરાહે અત્યાર સુધી શાનદાર બોલિંગ કરી છે. ગાબા ટેસ્ટની બીજી ઇનિંગમાં બુમરાહે માર્નસ લાબુશેનની બીજી વિકેટ લીધી હતી. આ વિકેટ લઈને બુમરાહે ઓસ્ટ્રેલિયાની ધરતી પર ઈતિહાસ રચી દીધો છે.
બુમરાહ હવે ઓસ્ટ્રેલિયામાં સૌથી વધુ વિકેટ લેનારો ભારતીય બોલર બની ગયો છે. આ પહેલા આ રેકોર્ડ ભારતના પૂર્વ દિગ્ગજ કેપ્ટન કપિલ દેવના નામે હતો. જેણે ઓસ્ટ્રેલિયાની ધરતી પર બોલિંગ દરમિયાન 51 વિકેટ લીધી હતી. ઓસ્ટ્રેલિયામાં જસપ્રીત બુમરાહના નામે હવે 52 વિકેટ છે. આ યાદીમાં ત્રીજા સ્થાને પૂર્વ ભારતીય દિગ્ગજ અનિલ કુંબલે છે, જેણે ઓસ્ટ્રેલિયામાં 49 વિકેટ લીધી હતી. આ સિવાય આર અશ્વિન 40 વિકેટ સાથે ચોથા સ્થાને યથાવત છે.
ભારતની શાનદાર બોલિંગ
ગાબા ટેસ્ટના બીજા દાવમાં પાંચમા દિવસે ટીમ ઈન્ડિયા તરફથી શાનદાર બોલિંગ જોવા મળી હતી. જેના કારણે ઓસ્ટ્રેલિયાએ માત્ર 33 રનમાં પોતાની 5 વિકેટ ગુમાવી દીધી હતી. જેમાં જસપ્રીત બુમરાહે 2, આકાશ દીપે 2 અને મોહમ્મદ સિરાજે એક વિકેટ ઝડપી હતી. આ પહેલા ટીમ ઈન્ડિયાનો પ્રથમ દાવ 260 રન પર જ સમેટાઈ ગયો હતો.
