બોર્ડર-ગાવસ્કર સિરીઝ સમાપ્ત થયા બાદ હવે ભારતની નજર ચેમ્પિયન્સ ટ્રોફી પર છે. ટીમ ઈન્ડિયા આ ટૂર્નામેન્ટમાં નવા વાઇસ કેપ્ટન સાથે જોવા મળી શકે છે. શુભમન ગિલને 2024માં વ્હાઈટ બોલ ટીમના વાઇસ-કેપ્ટન તરીકે નિયુક્ત કરવામાં આવ્યા હતા, પરંતુ હવે પસંદગીકારોએ પોતાનો નિર્ણય બદલી નાખ્યો છે. આ સાથે ટૂર્નામેન્ટમાં કેપ્ટન તરીકે રોહિત શર્માનું નામ નિશ્ચિત થઈ ગયું છે.
ચેમ્પિયન્સ ટ્રોફી પહેલા ભારત ઈંગ્લેન્ડ સામે ODI અને T-20 સિરીઝ રમશે અને તેની સાથે તે મેગા ઈવેન્ટની તૈયારીઓને મજબૂત કરશે, જે 19 ફેબ્રુઆરીથી 9 માર્ચ સુધી પાકિસ્તાનમાં રમાવાની છે. ભારત આ ટુર્નામેન્ટની તેની તમામ મેચ દુબઈમાં રમશે. T20 વર્લ્ડ કપ પછી, ગિલને ભારતના નેતૃત્વ જૂથમાં સામેલ કરવામાં આવ્યો અને તેને સફેદ બોલની ટીમોના ઉપ-કપ્તાન તરીકે નિયુક્ત કરવામાં આવ્યો. 2024 T20 વર્લ્ડ કપ અને 2023 ODI વર્લ્ડ કપમાં રોહિતનો ડેપ્યુટી બનેલો હાર્દિક પણ આ રેસમાં હતો, પરંતુ હવે તે દાવેદાર નથી. તેને કોઈપણ ફોર્મેટમાં વાઈસ કેપ્ટન બનાવવામાં આવ્યો નથી.
બુમરાહ ટીમનો વાઇસ કેપ્ટન રહેશે
‘ટાઈમ્સ ઓફ ઈન્ડિયા’ના અહેવાલ મુજબ, જસપ્રીત બુમરાહ ચેમ્પિયન્સ ટ્રોફીમાં ટીમનો ઉપ-કેપ્ટન હશે. આ પહેલા તે વનડેમાં પણ ટીમની કેપ્ટનશીપ કરી ચૂક્યો છે. તેણે 2023માં આયર્લેન્ડ સામે T20 ઈન્ટરનેશનલ મેચમાં કેપ્ટનશિપની શરૂઆત કરી હતી. બુમરાહ 2022 થી ટેસ્ટ ક્રિકેટમાં નેતૃત્વ જૂથનો ભાગ છે. તેણે ઈંગ્લેન્ડ સામેની એકમાત્ર ટેસ્ટમાં કેપ્ટનશિપની શરૂઆત કરી હતી.
ભારતે બુમરાહ સાથે પર્થમાં જીત મેળવી હતી
બુમરાહે બોર્ડર-ગાવસ્કર ટ્રોફીની બે ટેસ્ટ મેચોમાં ભારતનું નેતૃત્વ કર્યું હતું, જેમાં એકમાં ટીમ જીતી હતી, જ્યારે બીજીમાં ટીમ હારી હતી. બીસીસીઆઈ આ અઠવાડિયે ઈંગ્લેન્ડ સામેની સીરીઝ અને ચેમ્પિયન્સ ટ્રોફી માટે ટીમની જાહેરાત કરી શકે છે. બુમરાહને ઇંગ્લેન્ડ સામેની વનડે અને ટી-20 સીરીઝ માટે સંપૂર્ણ આરામ આપવામાં આવશે.
