IPL 2024: ઇન્ડિયન પ્રીમિયર લીગ (IPL)ની 17મી સિઝનમાં પેટ કમિન્સની કેપ્ટન્સીમાં સનરાઇઝર્સ હૈદરાબાદની ટીમે અત્યાર સુધી શાનદાર પ્રદર્શન કર્યું છે. હૈદરાબાદે 8 મેચ રમી છે, જ્યારે 5 જીતી છે અને માત્ર 3 હારી છે. રોયલ ચેલેન્જર્સ બેંગલોરની ટીમ સામે છેલ્લી મેચમાં ટીમ 35 રને હારી ગઈ હોવા છતાં, સનરાઈઝર્સ હૈદરાબાદ 10 પોઈન્ટ સાથે પોઈન્ટ ટેબલમાં ત્રીજા સ્થાને છે. આઈપીએલની 17મી સીઝનમાં હૈદરાબાદના શાનદાર પ્રદર્શનનું સૌથી મોટું કારણ મેદાન પરની તેમની આક્રમક રમત છે, જેમાં ટીમ બેટિંગમાં છગ્ગા ફટકારવાના મામલે અન્ય ટીમો કરતા ઘણી આગળ છે અને તેણે આ સિઝનમાં એક ખાસ સિદ્ધિ પણ હાંસલ કરી છે .
IPLના ઈતિહાસમાં પ્રથમ વખત સનરાઈઝર્સ હૈદરાબાદે 100 સિક્સ ફટકારી છે.
સનરાઇઝર્સ હૈદરાબાદની ટીમે રોયલ ચેલેન્જર્સ બેંગ્લોર સામેની મેચમાં કુલ 9 છગ્ગા ફટકાર્યા હતા, જેની સાથે તે IPLની 17મી સિઝનમાં 100 સિક્સર પુરી કરનાર પ્રથમ ટીમ બની ગઈ છે. આ સાથે, પ્રથમ વખત, સનરાઇઝર્સ હૈદરાબાદ IPL સિઝનમાં 100 કે તેથી વધુ સિક્સર ફટકારવામાં સફળ રહી છે. આ યાદીમાં મુંબઈ ઈન્ડિયન્સની ટીમ પ્રથમ સ્થાને છે જેણે અત્યાર સુધી 8 સિઝનમાં આ સિદ્ધિ મેળવી છે. જો આઈપીએલની 17મી સીઝનની વાત કરીએ તો 41 મેચ બાદ હૈદરાબાદની ટીમ 108 સિક્સર ફટકારવાના મામલે પહેલા સ્થાન પર છે, જ્યારે બીજા સ્થાને રોયલ ચેલેન્જર્સ બેંગ્લોરની ટીમ છે જેણે આ સિઝનમાં 90 સિક્સર ફટકારી છે.
IPL 2024માં 41 મેચ પછી સૌથી વધુ સિક્સર મારનાર ટીમ
- સનરાઇઝર્સ હૈદરાબાદ – 108 છગ્ગા
- રોયલ ચેલેન્જર્સ બેંગ્લોર – 90 છગ્ગા
- દિલ્હી કેપિટલ્સ – 86 છગ્ગા
- મુંબઈ ઈન્ડિયન્સ – 85 છગ્ગા
- કોલકાતા નાઈટ રાઈડર્સ – 69 છગ્ગા
અત્યાર સુધીમાં સૌથી વધુ છગ્ગા હેનરિક ક્લાસેનના બેટથી મારવામાં આવ્યા છે
IPLની 17મી સિઝનમાં 41 મેચો બાદ, સનરાઈઝર્સ હૈદરાબાદના હેનરિક ક્લાસેન અને અભિષેક શર્મા સૌથી વધુ સિક્સર મારનારા ખેલાડીઓ તરીકે પ્રથમ 2 સ્થાન પર છે. ક્લાસને 27 છગ્ગા અને અભિષેકે 26 છગ્ગા ફટકાર્યા છે. આ પછી ત્રીજા નંબર પર ચેન્નાઈ સુપર કિંગ્સ ટીમનો ભાગ શિવમ દુબે છે, જેણે અત્યાર સુધી 22 સિક્સર ફટકારી છે. નિકોલસ પૂરને પણ 22 છગ્ગા ફટકાર્યા છે, જ્યારે ઋષભ પંત 21 છગ્ગા સાથે પાંચમા સ્થાને છે.
