ભારતીય ક્રિકેટ કંટ્રોલ બોર્ડે ઈમ્પેક્ટ પ્લેયર નિયમ નાબૂદ કરવાનો ચોંકાવનારો નિર્ણય લીધો છે. તમામ રાજ્યોના ક્રિકેટ એસોસિએશનોને નોટિસ મોકલવામાં આવી છે કે આગામી સૈયદ મુશ્તાક અલી ટ્રોફીમાં ઈમ્પેક્ટ પ્લેયરનો નિયમ કોઈપણ રીતે લાગુ થશે નહીં. પરંતુ ઈન્ડિયન પ્રીમિયર લીગની આગામી સિઝન એટલે કે આઈપીએલ 2025માં તેના ઉપયોગ પર કોઈ પ્રતિબંધ લાદવામાં આવ્યો નથી.
બીસીસીઆઈએ રાજ્યોને મોકલેલી નોટિસમાં લખ્યું છે કે, “કૃપા કરીને નોંધ કરો કે બીસીસીઆઈએ વર્તમાન ડોમેસ્ટિક સીઝનમાંથી ઈમ્પેક્ટ પ્લેયર નિયમને દૂર કરવાનો નિર્ણય લીધો છે.” તમને જણાવી દઈએ કે ઈમ્પેક્ટ પ્લેયર નિયમ સૈયદ મુશ્તાક અલી ટ્રોફીમાં એક પ્રયોગ તરીકે રજૂ કરવામાં આવ્યો હતો, ત્યારબાદ તેને આઈપીએલમાં પણ લાગુ કરવામાં આવ્યો હતો. આઈપીએલની છેલ્લી સિઝન દરમિયાન, રોહિત શર્મા અને વિરાટ કોહલી જેવા ટોચના ખેલાડીઓએ પણ ઈમ્પેક્ટ પ્લેયર નિયમ સામે પોતાનો વિરોધ વ્યક્ત કર્યો હતો.
ગત સિઝનમાં મોહમ્મદ સિરાજે કહ્યું હતું કે આ નિયમ લાગુ થવાથી આઈપીએલમાં બોલરો માટે કંઈ બચ્યું નથી. આ નિયમની ટીકા પણ થઈ કારણ કે તેને ઓલરાઉન્ડર ખેલાડીઓની કારકિર્દી બરબાદ કરવાનું કારણ કહેવાય છે. આ બધું હોવા છતાં, IPL ટીમના મોટા ભાગના માલિકો અને બ્રોડકાસ્ટર્સે કહ્યું હતું કે આ નિયમ લાગુ થવાથી ટૂર્નામેન્ટ વધુ રોમાંચક અને સ્પર્ધાત્મક બની છે.
ભારતીય સ્થાનિક ક્રિકેટમાંથી હવે ઈમ્પેક્ટ પ્લેયરનો નિયમ હટાવી દેવામાં આવ્યો છે, પરંતુ આઈપીએલ 2025 પછી પણ આ નિયમ લીગમાં ચાલુ રહેશે કે કેમ તે જોવું રસપ્રદ રહેશે. હાલમાં, એ નિશ્ચિત છે કે IPLની આગામી સિઝનથી ઇમ્પેક્ટ પ્લેયરનો નિયમ ક્યાંય જતો નથી. આ સિવાય જો આપણે સૈયદ મુશ્તાક અલી ટ્રોફી પર નજર કરીએ તો BCCIએ ડોમેસ્ટિક T20 ક્રિકેટમાં એક ઓવરમાં 2 બાઉન્સર બોલનો નિયમ ફરીથી દાખલ કર્યો છે.
આ પણ વાંચો – બેંગલુરુ ટેસ્ટ પહેલા રોહિત શર્મા ચિંતિત , પ્લેઈંગ-11 પસંદ કરવામાં મુશ્કેલીમાં પડ્યો રોહિત
