Candy Crush Game: અમેરિકાના ફિલાડેલ્ફિયામાંથી એક ચોંકાવનારો કિસ્સો સામે આવ્યો છે. અહીં એક કેથોલિક પાદરીએ કેન્ડી ક્રશ અને મારિયો કાર્ટ ટૂર ગેમ્સ પર ચર્ચના 40 હજાર ડૉલરથી વધુ પૈસા ખર્ચ્યા. હાલમાં, છેલ્લા ત્રણ વર્ષમાં થયેલી ચોરી બદલ ચેસ્ટર કાઉન્ટીના પ્રોસીક્યુટર્સ દ્વારા પાદરીની ધરપકડ કરવામાં આવી છે.
મળતી માહિતી મુજબ, આરોપી પાદરીનું નામ રેવરેન્ડ લોરેન્સ કોઝાક છે. એકાઉન્ટન્ટ્સ દ્વારા સમીક્ષાને પગલે કોઝાકને 2022 માં ચર્ચમાં તેમના પદ પરથી દૂર કરવામાં આવ્યા હતા. ધ ફિલાડેલ્ફિયા ઈન્ક્વાયરર અનુસાર, એકાઉન્ટન્ટ્સને ચર્ચના ક્રેડિટ કાર્ડ સ્ટેટમેન્ટ્સ પર મોટી માત્રામાં Apple વ્યવહારો જોવા મળ્યા હતા. નિવેદન અનુસાર, Apple ID કોઝાક સાથે રજીસ્ટર કરવામાં આવ્યું હતું અને તેના પર 2019 થી 2022 દરમિયાન વ્યવહારો કરવામાં આવ્યા હતા.
પોલીસ દ્વારા પૂછપરછ દરમિયાન, આરોપીએ જણાવ્યું કે તેણે આ પૈસા જુગાર માટે વાપર્યા નથી. તે આ રમત દ્વારા પોતાની શક્તિ વધારવા માંગતો હતો. કોઝાકે જાણીજોઈને ચર્ચના ક્રેડિટ કાર્ડનો ઉપયોગ કરવાનો ઇનકાર કર્યો હતો. તેણે પોલીસને જણાવ્યું કે ક્રેડિટ કાર્ડ તેના ફોન સાથે લિંક છે તેથી શક્ય છે કે તેણે ભૂલથી તેનો ઉપયોગ કર્યો હોય. પોલીસ પાસેથી પ્રાપ્ત માહિતી અનુસાર, પાદરીએ તપાસ બાદ ચર્ચને 8000 ડોલર પાછા મોકલી દીધા હતા.
