ઈઝરાયલે ઈજિપ્ત સાથેની ગાઝાની 14 કિલોમીટર લાંબી સરહદ પર કબજો કરી લીધો છે. આ સરહદને ફિલાડેલ્ફિયા કોરિડોર તરીકે ઓળખવામાં આવે છે. ગાઝાનું રફાહ શહેર આ સરહદી વિસ્તારમાં આવેલું છે જ્યાં આ દિવસોમાં ઈઝરાયેલની સૈન્ય કાર્યવાહી ચાલી રહી છે.
અત્યાર સુધીમાં કુલ 36,224 પેલેસ્ટિનિયન માર્યા ગયા છે
સેનાએ કહ્યું છે કે તેને આ સરહદી વિસ્તારમાં 20 સુરંગ મળી છે. આ ટનલ ઇજિપ્તને રફાહ સાથે જોડે છે અને તેના દ્વારા હમાસને હથિયારો મળતા હતા. આ દરમિયાન રફાહ સહિત ગાઝાના અન્ય વિસ્તારોમાં ઈઝરાયેલ સેનાના હુમલા ચાલુ છે. આ હુમલાઓમાં અત્યાર સુધીમાં કુલ 36,224 પેલેસ્ટિનિયન માર્યા ગયા છે.
300 પેલેસ્ટિનિયન લડવૈયાઓ માર્યા ગયા ઇઝરાયલી સેનાના પ્રવક્તા રિયર એડમિરલ ડેનિયલ હેગેરીએ કહ્યું છે કે રફાહમાં ચાલી રહેલા ઓપરેશનમાં અત્યાર સુધીમાં લગભગ 300 પેલેસ્ટિનિયન લડવૈયાઓ માર્યા ગયા છે. ટૂંક સમયમાં અમે ત્યાં સંપૂર્ણ નિયંત્રણ સ્થાપિત કરીશું. દરમિયાન, સ્લોવેનિયાની સરકારે પણ પેલેસ્ટાઈનને સ્વતંત્ર રાષ્ટ્ર તરીકે માન્યતા આપવાની જાહેરાત કરી છે, પરંતુ આ દરખાસ્તને ત્યાંની સંસદની મંજૂરી મળવાની બાકી છે.
આ પહેલા 28 મેના રોજ સ્પેન, આયર્લેન્ડ અને નોર્વેએ પેલેસ્ટાઈનને માન્યતા આપવાની જાહેરાત કરી હતી, જેની ઈઝરાયલે સખત નિંદા કરી હતી. માલ્ટાએ કહ્યું છે કે તે ટૂંક સમયમાં પેલેસ્ટાઈનને માન્યતા આપવાની પણ જાહેરાત કરશે, જ્યારે બ્રિટન અને ઓસ્ટ્રેલિયાએ કહ્યું છે કે તેઓ આ અંગે વિચાર કરી રહ્યા છે.
ભારતે રફાહમાં 45 લોકોની હત્યાની નિંદા કરી છે
રફાહમાં ઈઝરાયેલના હવાઈ હુમલામાં 45 લોકોના મોત પર ભારતે દુઃખ વ્યક્ત કર્યું છે. કહ્યું કે હુમલામાં નિર્દોષ શરણાર્થીઓની હત્યા હૃદયને હચમચાવી દેનારી છે. હવાઈ હુમલામાં નાગરિકોના મોતની ઘટના 26મી મેના રોજ બની હતી. અમેરિકા સહિત અનેક દેશોએ આ ઘટનાની નિંદા કરી હતી.
ભારતીય વિદેશ મંત્રાલયના પ્રવક્તા રણધીર જયસ્વાલે કહ્યું કે હુમલામાં તંબુઓમાં રહેતા શરણાર્થીઓની હત્યા ગંભીર ચિંતાનો વિષય છે. આવી ઘટનાનું પુનરાવર્તન ન થવું જોઈએ.
