Heat Wave: પાકિસ્તાનના કરાચીમાં ગરમીના કારણે ઓછામાં ઓછા 20 લોકોના મોત થયા છે. આ સંબંધમાં એક અધિકારીએ મંગળવારે જણાવ્યું કે, અત્યંત ગરમ હવામાનનો સામનો કરી રહેલા પાકિસ્તાનના સૌથી મોટા શહેર કરાચીમાં છેલ્લા 48 કલાકમાં ઓછામાં ઓછા 20 લોકોના મોત થયા છે અને અન્ય લોકો હીટસ્ટ્રોકનો ભોગ બન્યા છે.
બચાવ અધિકારીઓએ જણાવ્યું કે સોમવારે 10 મૃતદેહોને શબઘરમાં મોકલવામાં આવ્યા બાદ મંગળવારે કરાચીની શેરીઓ અને અન્ય સ્થળોએથી વધુ 10 મૃતદેહો મળી આવ્યા હતા. આ તમામ લોકો 40 ડિગ્રીથી વધુ તાપમાન સાથે ચાલી રહેલી હીટ વેવનો ભોગ બન્યા હોવાની આશંકા છે. બચાવ સેવાઓ અને આરોગ્ય અધિકારીઓએ પુષ્ટિ કરી છે કે શરીર પર કોઈ ઈજાના નિશાન નથી.
ફૂટપાથ અને રસ્તા પરથી લાશ મળી
પોલીસ સર્જન સુમૈયા સૈયદે જણાવ્યું હતું કે ફૂટપાથ અથવા રસ્તાની બાજુએ પડેલા મોટા ભાગના મૃતદેહો લાંબા ગાળાના ડ્રગ વ્યસનીના હતા અને દેખીતી રીતે શહેરમાં ભારે ગરમીને કારણે મૃત્યુ પામ્યા હતા.
તેમણે કહ્યું કે 20 મૃતદેહો પર કોઈ ઈજાના નિશાન નથી અને મૃતકોના દેખાવ અને શારીરિક સ્થિતિ દર્શાવે છે કે તેઓ ડ્રગ્સના બંધાણી હતા. આ તમામના મૃતદેહ ફૂટપાથ કે રોડ કિનારે મળી આવ્યા હતા.
હવામાન વિભાગે સોમવારે શહેરમાં મહત્તમ તાપમાન 42 ડિગ્રી સેલ્સિયસ નોંધ્યું હતું, જે રવિવારના 41 ડિગ્રી સેલ્સિયસ કરતાં એક ડિગ્રી વધુ હતું. કરાચી જેવા દરિયાકાંઠાના શહેરો માટે આ તાપમાન ઘણું વધારે છે.
હોસ્પિટલ હીટસ્ટ્રોક પીડિતોથી ભરેલી છે
ડૉ. સૈયદે જણાવ્યું હતું કે મૃતદેહો સિવાય, તેઓને ત્રણ સરકારી હોસ્પિટલોના ઇમરજન્સી રૂમમાં હીટસ્ટ્રોક પીડિતોના ઘણા કેસ પણ મળી રહ્યા છે. દરમિયાન, ઇધી વેલ્ફેર ફાઉન્ડેશનના અધિકારીઓએ દાવો કર્યો હતો કે શહેરમાં તેમના શબઘરોમાં પણ છેલ્લા ત્રણ દિવસ દરમિયાન લાવવામાં આવેલા મૃતદેહોની સંખ્યામાં વધારો જોવા મળ્યો છે.
ઇધી ફાઉન્ડેશનના વડા ફૈઝલ એધીએ જણાવ્યું હતું કે, “અમારા ત્રણ શબઘરોમાં મૃતદેહોની સંખ્યામાં ત્રણ ગણો વધારો જોવા મળ્યો છે અને 23 જૂનથી, અમને અમારા શબઘરોમાં ઓછામાં ઓછા 40 મૃતદેહો મળ્યા છે.”
હવામાન વિભાગે આગામી બે દિવસમાં આકરી ગરમી પડવાની આગાહી કરી છે. આ સમયગાળા દરમિયાન તાપમાન 38 ડિગ્રીથી 40 ડિગ્રીની વચ્ચે રહેવાની ધારણા છે.
