આ વર્ષે જાન્યુઆરી મહિનામાં અત્યાર સુધીમાં અમદાવાદ શહેરમાં રસ્તાઓ પર રખડતા 202 ઢોર પકડાયા છે. સપ્ટેમ્બર 2023 થી પશુ પકડવાની ઝુંબેશ શરૂ કરવામાં આવી હતી, ત્યારથી અત્યાર સુધીમાં શહેરમાં 16600 પશુઓ પકડીને પાંજરાપોળ મોકલવામાં આવ્યા છે. પોલીસમાં ઘણા પશુપાલકો સામે કેસ પણ નોંધાયા છે.
મ્યુનિસિપલ કોર્પોરેશનના એનિમલ ન્યુસન્સ કંટ્રોલ ડિપાર્ટમેન્ટ (CNCD) અનુસાર, 1 જાન્યુઆરીથી ગુરુવાર સુધીમાં પકડાયેલા રખડતા પ્રાણીઓમાં, સૌથી વધુ 51 ઉત્તર ઝોનના છે. આ ઉપરાંત, પૂર્વ ઝોનમાં 48, દક્ષિણ ઝોનમાં 31, ઉત્તર પશ્ચિમમાં 27, પશ્ચિમમાં 26, દક્ષિણ પશ્ચિમમાં 14 અને મધ્ય ઝોનમાં 5 ઢોર પકડાયા હતા. આ સમયગાળા દરમિયાન, ૧૦૮૭ પશુઓ માટે લાઇસન્સ પણ લેવામાં આવ્યા છે. ઉલ્લેખનીય છે કે શહેરમાં પશુઓ રાખવા માટે લાઇસન્સ ફરજિયાત બનાવવામાં આવ્યું છે.
16 મહિનામાં 3154 પશુઓની નોંધણી
વિભાગ અનુસાર, સપ્ટેમ્બર 2023 થી અત્યાર સુધીમાં, 637 પશુ માલિકો દ્વારા 3154 પશુઓની નોંધણી કરવામાં આવી છે. આ સમયગાળા દરમિયાન, પોલીસ સ્ટેશનમાં 235 લોકો સામે કેસ પણ નોંધવામાં આવ્યો હતો. વિભાગનો દાવો છે કે રખડતા પ્રાણીઓ સંબંધિત ફરિયાદોમાં ઝડપથી ઘટાડો થયો છે.
