Loksabha Election 2024: ગુજરાતમાં આજે લોકસભાની ચૂંટણી માટે શાંતિપૂર્વક મતદાન થયું હતું જેમાં કોઈ અનિચ્છનિય ઘટના બની નથી. આજથી ચાર-પાંચ દિવસ માટે ગુજરાતમાં તાપમાન ઉંચું રહેવાનું છે જેના કારણે વોટિંગને અસર થઈ હોય તેમ લાગે છે કારણ કે વોટિંગની ટકાવારી ગયા વર્ષ કરતા ઓછી છે. લોકસભાની ચૂંટણીમાં આજે ત્રીજા તબક્કાનું મતદાન હતું જેમાં આજે ગુજરાતની તમામ 25 સીટ આવરી લેવાઈ હતી. સુરતની બેઠક પર ભાજપ પહેલેથી બિનહરીફ જીતી ગયું હોવાથી 25 સીટ પર વોટિંગ થયું હતું. આ ઉપરાંત પોરબંદર, વિજાપુર, ખંભાત, વાઘોડિયા અને માણાવદર એમ 5 વિધાનસભા સીટની પેટાચૂંટણી પણ હતી.
ગુજરાતમાં વર્ષ 2019ની લોકસભા ચૂંટણીમાં સરેરાશ 64 ટકા વોટિંગ થયું હતું તેની સરખામણીમાં આ વખતે ઓછું મતદાન થયું હોય તેવું જણાય છે કારણ કે પાંચ વાગ્યાના આંકડા પ્રમાણે 55 ટકા વોટિંગ થયું હતું. આ વખતે વલસાડમાં પાંચ વાગ્યા સુધીમાં 68 ટકા વોટિંગ થયું હતું જ્યારે અમરેલીમાં સૌથી ઓછું 46 ટકા મતદાન થયું છે. 5 વાગ્યા સુધીમાં બીજા રાજ્યોને પણ ગણવામાં આવે તો 63.77 ટકા મતદાન થયું છે. તેમાં મહારાષ્ટ્રમાં સૌથી ઓછું 53.40 ટકા વોટિંગ થયું છે. બિહાર-છત્તીસગઢમાં ચૂંટણી દરમિયાન ત્રણ વ્યક્તિના મોતની ઘટનાઓ બની છે.
આજે ગુજરાતમાં ગરમીનો પારો અસહ્ય હોવાના કારણે બપોરના ભાગમાં મતદાનની ગતિ ધીમી પડી ગઈ હતી. જાફરાબાદમાં ચૂંટણીની ફરજ બજાવતા એક કર્મચારીનું હાર્ટ એટેકથી મોત થયું હોવાના અહેવાલ છે. આ ઉપરાંત એક મહિલા મતદાતા પણ મતદાનમથકમાં જ ઢળી પડી હતી.
ગુજરાતમાં કોંગ્રેસે વોટિંગમાં ગેરરીતી અને બોગસ વોટિંગને લગતી 17 ફરિયાદો કરી છે. નરેન્દ્ર મોદીના રોડ શોમાં આચાર સંહિતાનું ઉલ્લંઘન થયું હોવાની ફરિયાદ છે. આ ઉપરાંત અમદાવાદમાં કેટલીક જગ્યાએ ગેરરીતી અંગે ફરિયાદ કરવામાં આવી છે. મતદાન ચાલુ હોય ત્યારે અમીત શાહ લાઈવ ઓન એર હોય તેની સામે પણ વાંધો ઉઠાવવામાં આવ્યો હતો. આ ઉપરાંત કેટલીક જગ્યાએ ઈવીએમ મશીન ખોટવાઈ ગયા હતા જેને પછી બદલવામાં આવ્યા અને વોટિંગ કરવામાં આવ્યું હતું.
ગુજરાતમાં લોકસભાની ચૂંટણી માટે કુલ 266 ઉમેદવારો તથા વિધાનસભાની પેટાચૂંટણી માટે 24 ઉમેદવારો વચ્ચે ચૂંટણી યોજાઈ રહી છે. 25 લોકસભાની સીટ માટે ભાજપના 25, કોંગ્રેસના 23 અને આપના 2 ઉમેદવાર ચૂંટણીના મેદાનમાં છે. આ ઉમેદવારોમાં રૂપાલા, અમિત શાહ અને માંડવિયા 4 કેન્દ્રીય મંત્રીનો સમાવેશ થાય છે.
