દિલ્હી સરકારે નવા વર્ષ પર લોકોને ભેટ આપી છે. હવે નવા વર્ષ પછી દિલ્હીમાં વીજળી બિલમાં થોડો ઘટાડો થશે. દિલ્હી સરકારે નિર્ણય લીધો છે કે વીજળીના બિલ પરનો સરચાર્જ 65થી ઘટાડીને 40 ટકા કરવામાં આવશે. આ સાથે દિલ્હીના લોકોને વીજળીના બિલમાં રાહત મળવાની છે.
દિલ્હીમાં પાવર પરચેઝ એડજસ્ટમેન્ટ ચાર્જ (PPAC) દરો BRPL માટે 35.83 ટકા, BYPL માટે 38.12 ટકા અને TPDDL માટે 36.33 ટકા હતા. તેઓ અનુક્રમે 18.19 ટકા, 13.63 ટકા અને 20.52 ટકા ઘટ્યા હતા. હવે આનો ફાયદો દિલ્હીના લોકોને મળવાનો છે.
જો કે, નવી દિલ્હી મ્યુનિસિપલ કોર્પોરેશન (NDMC), જે લ્યુટિયન્સ દિલ્હી અને તેની આસપાસ વીજળી સપ્લાય કરે છે, દ્વારા સરચાર્જમાં સુધારો કરવા માટેની અરજી હજુ પણ પંચ સમક્ષ પેન્ડિંગ છે. નિષ્ણાતો કહે છે કે પાવર પરચેઝ એડજસ્ટમેન્ટ કોસ્ટ (PPAC) માં સુધારો આગામી બિલિંગ ચક્રથી તમામ ગ્રાહકો માટે વીજળી બિલમાં ઘટાડો કરશે.
સરચાર્જ કેમ વધારે હતો?
દિલ્હી સરકારનું કહેવું છે કે આ વર્ષે સખત ગરમી હતી, જેના કારણે દિલ્હીમાં વીજળીની માંગ ઘણી વધારે હતી. 24-કલાક વીજ પુરવઠો સુનિશ્ચિત કરવા માટે, ડિસ્કોમ્સે બજાર દરો પર પાવર ખરીદ્યો, જેના કારણે PPAC (સરચાર્જ)માં વધારો થયો.
હવે આ મામલે રાજકારણ પણ શરૂ થયું છે. એક તરફ ભાજપે શ્રેય લેવાનો પ્રયાસ કર્યો હતો, ત્યારે મુખ્યમંત્રીએ તેનો વળતો પ્રહાર કર્યો છે. દિલ્હી ભાજપના અધ્યક્ષ વીરેન્દ્ર સચદેવાએ કહ્યું કે ભાજપના દબાણને કારણે ડીઈઆરસીએ વિશ્લેષણ કરવું પડ્યું, જેના કારણે કાપ લાગુ કરવો પડ્યો. ભાજપે AAP સરકાર અને ખાનગી વીજ કંપનીઓ વચ્ચેની સાંઠગાંઠનો પર્દાફાશ કર્યો છે. જો દિલ્હીમાં ભાજપની સરકાર બનશે તો કેજરીવાલ સરકાર અને ખાનગી કંપનીઓ દ્વારા 10 વર્ષથી ચાલતી આ લૂંટ તપાસ માટે CBIને સોંપવામાં આવશે.
સીએમ આતિશીએ કહ્યું કે આ કાપથી સમગ્ર દિલ્હીના તમામ ગ્રાહકોના વીજ બિલમાં ઘટાડો થશે. AAPના પ્રામાણિક, લોકો-કેન્દ્રિત શાસનને કારણે આ શક્ય બન્યું છે. જો ભાજપ ક્રેડિટ લેવા માટે આટલું જ ઉત્સુક હોય તો તેણે તેના શાસનવાળા 22 રાજ્યોમાં વીજળીના ભાવ ઘટાડવા જોઈએ.
