દિલ્હી રમખાણો કેસમાં તાહિર હુસૈનને સુપ્રીમ કોર્ટે રાહત આપી, ચૂંટણી પ્રચારની મંજૂરી આપી

સુપ્રીમ કોર્ટે 2020ના દિલ્હી રમખાણોના આરોપી અને ભૂતપૂર્વ કાઉન્સિલર તાહિર હુસૈનને રાહત આપી છે અને કસ્ટડી પેરોલને મંજૂરી આપી છે. આ પછી તાહિર હુસૈનને પોલીસ કસ્ટડીમાં પ્રચાર કરવાની પરવાનગી મળી ગઈ છે. તાહિર હુસૈન દિલ્હીની મુસ્તફાબાદ બેઠક પરથી AIMIM પાર્ટીની ટિકિટ પર વિધાનસભા ચૂંટણી લડી રહ્યા છે. તાહિર હુસૈને અગાઉ ચૂંટણી પ્રચાર માટે જામીન મેળવવા માટે સુપ્રીમ કોર્ટમાં અરજી દાખલ કરી હતી, પરંતુ તેને મંજૂરી આપવામાં આવી ન હતી. હવે તેણે પોલીસ કસ્ટડીમાં પ્રચાર કરવા માટે સુપ્રીમ કોર્ટ પાસેથી પરવાનગી માંગી હતી. જેને સુપ્રીમ કોર્ટે મંજૂરી આપી દીધી છે.

સુપ્રીમ કોર્ટે આ શરતો લાદી

બપોરે 2 વાગ્યે પસાર થયેલા પોતાના આદેશમાં, સુપ્રીમ કોર્ટની બેન્ચે તાહિર હુસૈનને કસ્ટડી પેરોલ મંજૂર કર્યો. સુપ્રીમ કોર્ટે તાહિર હુસૈનને 29 જાન્યુઆરીથી 3 ફેબ્રુઆરી સુધી કસ્ટડી પેરોલ મંજૂર કર્યા છે. આ સમયગાળા દરમિયાન, તેની કસ્ટડીનો જે પણ ખર્ચ થશે તે તાહિર હુસૈને ભોગવવાનો રહેશે. આમાં દિલ્હી પોલીસ સ્ટાફ, જેલ વાહનો અને એસ્કોર્ટ વાહનોનો ખર્ચ પણ શામેલ છે. સુપ્રીમ કોર્ટના નિર્દેશ મુજબ, તાહિર હુસૈનને પ્રચાર માટે દિવસ દરમિયાન જ જેલની બહાર જવાની મંજૂરી આપવામાં આવશે અને દરરોજ રાત્રે જેલમાં પાછા ફરવું પડશે. તેમણે દરરોજ ૧૨ કલાકના જામીન માટે ૨.૪૭ લાખ રૂપિયા ચૂકવવા પડશે, જે તેમની સુરક્ષા પરના ખર્ચનો એક ભાગ હશે.

ઉલ્લેખનીય છે કે તાહિર હુસૈન વિરુદ્ધ ઘણા કેસ ચાલી રહ્યા છે. તેમણે અગાઉ પણ ચૂંટણી પ્રચાર માટે જામીન માંગ્યા હતા, પરંતુ સુપ્રીમ કોર્ટની બે જજોની બેન્ચે તે અરજી પર અલગ અલગ આદેશો આપ્યા હતા. જે બાદ અરજીને મોટી બેન્ચમાં મોકલવામાં આવી હતી.

કસ્ટડી પેરોલ શું છે?

કસ્ટડી પેરોલ હેઠળ મુક્ત થયેલ વ્યક્તિ જેલની બહાર હોય ત્યારે પણ પોલીસ કસ્ટડીમાં રહે છે. આ જામીન પરિવારના સભ્યનું મૃત્યુ, લગ્ન કે બીમારી વગેરે જેવી કટોકટીની સ્થિતિમાં આપવામાં આવે છે. તે ખૂબ જ ટૂંકા ગાળા માટે આપવામાં આવે છે.

તાહિર હુસૈનના વકીલે આ દલીલો આપી હતી

સુનાવણી દરમિયાન, તાહિર હુસૈન વતી હાજર રહેલા વરિષ્ઠ વકીલ સિદ્ધાર્થ અગ્રવાલે ન્યાયાધીશ વિક્રમ નાથ, ન્યાયાધીશ સંજય કરોલ અને ન્યાયાધીશ સંદીપ મહેતાની બેન્ચને જણાવ્યું હતું કે ‘ચૂંટણી પ્રચારમાં હવે ફક્ત ચારથી પાંચ દિવસ બાકી છે, આવા સમયમાં પરિસ્થિતિમાં, તેને પોલીસ કસ્ટડીમાં પ્રચાર કરવાની મંજૂરી આપવી જોઈએ. તાહિર હુસૈને પોતાની અપીલમાં કહ્યું કે ‘તેઓ ચૂંટણી પ્રચાર દરમિયાન તેમના ઘરે પણ નહીં જાય અને હોટલમાં રહેશે.’ તાહિર હુસૈનનું ઘર મુસ્તફાબાદ વિસ્તારમાં આવેલું છે, જ્યાં રમખાણો થયા હતા.

એડિશનલ સોલિસિટર જનરલ એસ.વી. રાજુએ તાહિર હુસૈનની અપીલનો વિરોધ કર્યો અને દલીલ કરી કે જો તેમને રાહત આપવામાં આવે તો દરેક વ્યક્તિ જેલમાંથી ચૂંટણી માટે નામાંકન ભરવાનું શરૂ કરશે. દલીલો સાંભળ્યા પછી, કોર્ટે એસવી રાજુને પોલીસ કસ્ટડીમાં તાહિર હુસૈનના ચૂંટણી પ્રચાર માટે કરવામાં આવેલા ખર્ચ અને વ્યવસ્થાઓ વિશે માહિતી આપવા કહ્યું હતું.