બાંગ્લાદેશ ક્રિકેટ બોર્ડે ચેમ્પિયન્સ ટ્રોફી 2025 માટે 15 સભ્યોની ટીમની જાહેરાત કરી છે. પોતાની બોલિંગ એક્શનને કારણે સમાચારમાં રહેનારા ડેશિંગ ઓલરાઉન્ડર શાકિબ અલ હસનને બાંગ્લાદેશ ક્રિકેટ બોર્ડ દ્વારા ICC ચેમ્પિયન્સ ટ્રોફી માટે બાંગ્લાદેશ ક્રિકેટ ટીમની ટીમમાંથી બહાર કરવામાં આવ્યો છે. નઝમુલ હુસૈન શાંતોને 15 સભ્યોની બાંગ્લાદેશ ટીમના કેપ્ટન બનાવવામાં આવ્યા છે. બાંગ્લાદેશની ટીમ 20 ફેબ્રુઆરીથી ચેમ્પિયન્સ ટ્રોફીમાં પોતાના અભિયાનની શરૂઆત કરશે. બાંગ્લાદેશનો પહેલો મુકાબલો ટીમ ઈન્ડિયા સાથે હશે.
શાકિબ બોલિંગ એક્શન ટેસ્ટમાં નિષ્ફળ ગયો
છેલ્લા ઘણા સમયથી, ડેશિંગ ઓલરાઉન્ડર શાકિબ અલ હસન તેની બોલિંગ એક્શનને કારણે સમાચારમાં છે. ઈંગ્લેન્ડમાં ઘરેલુ ક્રિકેટ રમતી વખતે, શાકિબ પર આરોપ મૂકવામાં આવ્યો હતો કે તેની બોલિંગ કાયદેસર નહોતી. જે બાદ શાકિબને બોલિંગથી સસ્પેન્ડ કરવામાં આવ્યો હતો. હવે શાકિબને બોલિંગ એક્શનની કસોટીમાંથી પસાર થવું પડ્યું, જેમાં તે નિષ્ફળ ગયો. જેનો ખુલાસો બાંગ્લાદેશ ક્રિકેટ બોર્ડ દ્વારા કરવામાં આવ્યો છે. હવે તેને ICC ચેમ્પિયન્સ ટ્રોફી માટે બાંગ્લાદેશ ટીમમાં તક પણ મળી નથી. શાકિબ ઉપરાંત વિકેટકીપર બેટ્સમેન લિટન દાસને પણ ચેમ્પિયન્સ ટ્રોફી ટીમમાં તક મળી નથી.
ચેમ્પિયન્સ ટ્રોફી 2025 માટે બાંગ્લાદેશ ટીમ
નઝમુલ હુસૈન શાંતો (કેપ્ટન), સૌમ્ય સરકાર, તનજીદ હસન, તૌહીદ હૃદયોય, મુશફિકુર રહીમ, મોહમ્મદ મહમુદુલ્લાહ, ઝાકર અલી અનિક, મહેદી હસન મિરાઝ, રિશાદ હુસૈન, તસ્કિન અહેમદ, મુસ્તફિઝુર રહેમાન, પરવેઝ હુસૈન ઇમોન, નસુમ અહેમદ, તન્ઝીમ હસન સાકિબ, નાહિદ રાણા
ચેમ્પિયન્સ ટ્રોફી 2025 માં બાંગ્લાદેશની મેચો
- ૨૦ ફેબ્રુઆરી – બાંગ્લાદેશ વિરુદ્ધ ભારત, દુબઈ
- ૨૪ ફેબ્રુઆરી – બાંગ્લાદેશ વિરુદ્ધ ન્યુઝીલેન્ડ, રાવલપિંડી
- ૨૭ ફેબ્રુઆરી – પાકિસ્તાન વિરુદ્ધ બાંગ્લાદેશ, રાવલપિંડી
