Israel-Hamas war: ગાઝાની ઇજિપ્તની સરહદ પર સ્થિત રફાહ શહેરના પૂર્વ ભાગમાં ઇઝરાયેલી દળો અને પેલેસ્ટિનિયન લડવૈયાઓ વચ્ચે લડાઈ ચાલુ છે. સોમવાર રાતથી ઇઝરાયેલી સેના દ્વારા ચાલી રહેલી કાર્યવાહીમાં અત્યાર સુધીમાં 35 લોકો માર્યા ગયા છે. માર્યા ગયેલા લોકોમાં ચાર મહિનાનું બાળક પણ સામેલ છે.
ઈઝરાયેલ ડ્રોન વડે હવાઈ હુમલા કરી રહ્યું છે
ઇઝરાયલી સૈન્યના જણાવ્યા અનુસાર, પૂર્વી રફાહ વિસ્તારમાં ટેન્ક અને સશસ્ત્ર વાહનોની બ્રિગેડ કાર્યરત છે, જ્યારે ડ્રોન દ્વારા હવાઈ હુમલા કરવામાં આવી રહ્યા છે. આ હુમલાઓમાં હમાસ અને ઈસ્લામિક જેહાદની લગભગ 100 જગ્યાઓને નિશાન બનાવવામાં આવી છે.
અમેરિકાએ ઈઝરાયેલને ચેતવણી આપી
આ દરમિયાન અમેરિકી રાષ્ટ્રપતિ જો બિડેને ઈઝરાયેલને ચેતવણી આપી છે કે જો તે રફાહ પર મોટી કાર્યવાહી કરશે તો તેને તમામ હથિયારોની સપ્લાય બંધ કરી દેવામાં આવશે. રોયટર્સ અનુસાર, ઇજિપ્તની રાજધાની કૈરોમાં બંને પક્ષો વચ્ચે યુદ્ધવિરામની વાતચીત ચાલી રહી છે. આ વાટાઘાટો અમેરિકા, ઈજિપ્ત અને કતારની મધ્યસ્થી હેઠળ થઈ રહી છે. અમેરિકન જાસૂસી સંસ્થા CIAના ડાયરેક્ટર વિલિયમ બર્ન્સ ફરી કૈરો પહોંચી ગયા છે અને વાતચીતમાં મદદ કરી રહ્યા છે.
ઈઝરાયેલે મસ્જિદને પણ નિશાન બનાવી હતી
દરમિયાન, હમાસ અને ઇસ્લામિક જેહાદે જણાવ્યું હતું કે તેમના લડવૈયાઓ રફાહના પૂર્વ ભાગમાં ઇઝરાયેલના સૈન્ય હુમલાનો સંપૂર્ણ બળ સાથે જવાબ આપી રહ્યા છે. પેલેસ્ટિનિયન લડવૈયાઓ ટેન્ક વિરોધી રોકેટ અને મોર્ટાર વડે ઇઝરાયલી દળો પર હુમલો કરી રહ્યા છે. લડાઈ દરમિયાન ઈઝરાયલી દળોએ આ વિસ્તારની એક મસ્જિદ પર પણ હુમલો કર્યો હતો. ઈઝરાયેલે કહ્યું છે કે રફાહમાં હમાસના હજારો આતંકવાદીઓ હથિયારો સાથે છુપાયેલા છે. ગાઝાના અન્ય વિસ્તારોમાં પણ ઈઝરાયેલી સેનાના હુમલા ચાલુ છે.
ગાઝામાં અત્યાર સુધીમાં કેટલા લોકોના મોત થયા છે?
ગુરુવારે ઇઝરાયેલની સેનાએ રફાહ ઉપરાંત હમાસની 25 જગ્યાઓને નિશાન બનાવી હતી. ગાઝામાં ઈઝરાયેલના હુમલામાં અત્યાર સુધીમાં લગભગ 35 હજાર લોકો માર્યા ગયા છે.
અમેરિકાએ હથિયારોની સપ્લાય બંધ કરવાની ધમકી આપી હતી
અમેરિકી રાષ્ટ્રપતિ બિડેને કહ્યું છે કે ઈઝરાયલ હજુ સુધી રફાહમાં સૈન્ય કાર્યવાહીના સંબંધમાં એવી કોઈ યોજના રજૂ કરી શક્યું નથી, જેમાં સામાન્ય લોકોની સુરક્ષા માટે સંતોષકારક વ્યવસ્થા હોય. જો ઈઝરાયેલ રફાહમાં પ્રવેશ કરશે તો ઈઝરાયેલને શસ્ત્રોનો પુરવઠો બંધ કરી દેવામાં આવશે. નોંધનીય છે કે અમેરિકાએ બુધવારે ઈઝરાયેલને ઘાતક બોમ્બની સપ્લાય બંધ કરી દીધી હતી. અમેરિકા ઈઝરાયેલને સૌથી વધુ હથિયાર અને દારૂગોળો સપ્લાયર કરે છે.
