મહાકાલની નગરી ઉજ્જૈનના મહાકાલેશ્વર મંદિરમાં શ્રદ્ધાળુઓની આસ્થા પર ઊંડો ફટકો પડ્યો છે. મંદિરમાં વર્ષોથી ચાલી રહેલા ભ્રષ્ટાચારનો પર્દાફાશ થયો છે. જિલ્લા વહીવટીતંત્ર અને પોલીસ દ્વારા તપાસમાં બે કર્મચારીઓની ધરપકડ કરવામાં આવી છે, જેમના બેંક ખાતામાં લાખો રૂપિયાના ગેરકાયદેસર વ્યવહારો મળી આવ્યા છે. મહાકાલેશ્વર મંદિર દર વર્ષે લગભગ 100 કરોડ રૂપિયાની કમાણી કરે છે, જેમાં દાન, લાડુનો પ્રસાદ, ઝડપી દર્શન અને અભિષેકનો સમાવેશ થાય છે.
કલેક્ટર નીરજ કુમાર સિંહના જણાવ્યા અનુસાર, છેલ્લા કેટલાક મહિનાઓથી મંદિરની આવકમાં ઘટાડો થયો હતો, ત્યારબાદ વહીવટીતંત્રે તપાસ શરૂ કરી હતી. તપાસમાં સામે આવ્યું છે કે મંદિરના બે કર્મચારીઓ વિનોદ ચોકસે અને રાકેશ શ્રીવાસ્તવ ભક્તો પાસેથી ગેરકાયદેસર રીતે પૈસા વસૂલતા હતા. તેમના બેંક ખાતામાંથી લાખો રૂપિયાના ઓનલાઈન ટ્રાન્ઝેક્શન મળી આવ્યા છે.
મહાકાલ મંદિર સમિતિના અધ્યક્ષ અને કલેક્ટર નીરજ કુમાર સિંહે જણાવ્યું હતું કે મહાકાલેશ્વર મંદિરમાં ભ્રષ્ટાચારના સમાચાર સામે આવ્યા બાદ કડક પગલાં લેવામાં આવ્યા હતા. ગુનેગારો સામે એફઆઈઆર દાખલ કરવામાં આવી છે, અને તેમની સેવાઓ સમાપ્ત કરવામાં આવી છે. ગુરુવારે મહાકાલ પોલીસ સ્ટેશનમાં આ મામલે FIR નોંધવામાં આવી હતી. વહીવટીતંત્રે પુષ્ટિ કરી છે કે બંને કર્મચારીઓની ધરપકડ કરવામાં આવી છે અને મંદિર સમિતિ તેમની સંડોવણીની તપાસ કરી રહી છે. ટૂંક સમયમાં આ મામલે વધુ મોટા ખુલાસા થઈ શકે છે.
3 કરોડ 80 લાખનો ભ્રષ્ટાચાર
કલેકટરે વધુમાં જણાવ્યું હતું કે, મંદિરમાં આવનારા ભક્તોની સંખ્યા પ્રમાણે આવકનો અંદાજ છે. જેના કારણે આવકમાં અંદાજે 3 કરોડ 80 લાખ રૂપિયાનો ઘટાડો થયો છે. ગુરુવારે મહાકાલ પોલીસ સ્ટેશનમાં આ મામલે FIR નોંધવામાં આવી છે. જેમાં પૂજારી અને તેના પ્રતિનિધિઓની ધરપકડ કરવામાં આવી છે.
