કેન્યાએ ભારતના અદાણી ગ્રુપ સાથેના બે મહત્વના કરારો રદ કર્યા છે. એરપોર્ટના વિસ્તરણ અને ઊર્જા ક્ષેત્રે કરોડો ડોલરના સોદા રદ કરવામાં આવ્યા છે. આ માહિતી કેન્યાના રાષ્ટ્રપતિ વિલિયમ રૂટોએ આપી હતી. તેમણે કહ્યું, “એશિયાના સૌથી ધનિક વ્યક્તિઓમાંના એક ગૌતમ અદાણી વિરુદ્ધ અમેરિકા દ્વારા લાંચ અને છેતરપિંડીનો આરોપ મૂકવામાં આવ્યો છે. આ પછી, અદાણી જૂથ સાથેના આ સોદાઓને રદ કરવાનો નિર્ણય લેવામાં આવ્યો છે.
કેન્યાના રાષ્ટ્રપતિ રૂટોએ રાષ્ટ્રને સંબોધનમાં કહ્યું, “આ નિર્ણય અમારી તપાસ એજન્સીઓ અને ભાગીદાર દેશો દ્વારા આપવામાં આવેલી નવી માહિતીના આધારે લેવામાં આવ્યો છે.” જોકે તેણે અમેરિકાનું નામ લીધું ન હતું. અદાણી ગ્રૂપ એક કરાર પર હસ્તાક્ષર કરવાની પ્રક્રિયામાં હતું. આ અંતર્ગત રાજધાની નૈરોબીમાં કેન્યાના મુખ્ય એરપોર્ટનું આધુનિકીકરણ કરવાનું હતું. વધારાની એરસ્ટ્રીપ અને ટર્મિનલ બનાવવાની હતી. બદલામાં, જૂથ 30 વર્ષ સુધી એરપોર્ટનું સંચાલન કરવા જઈ રહ્યું હતું.
અદાણી ગ્રુપ સાથેની આ ડીલ બાદ કેન્યામાં વિરોધ થયો હતો. એરપોર્ટના કર્મચારીઓ હડતાળ પર ઉતરી ગયા હતા. કર્મચારીઓએ કહ્યું કે આનાથી કામની સ્થિતિ વધુ ખરાબ થશે. કેટલાક કિસ્સાઓમાં, નોકરીઓ પણ જશે. અદાણી ગ્રૂપે પૂર્વ આફ્રિકાના ટ્રેડિંગ હબ કેન્યામાં પાવર ટ્રાન્સમિશન લાઇન બનાવવાનો સોદો પણ મેળવ્યો હતો. ઉર્જા પ્રધાન ઓપિયો વાન્ડેઇએ સંસદીય સમિતિને જણાવ્યું હતું કે સોદા પર હસ્તાક્ષર કરવામાં કેન્યા તરફથી કોઈ ‘લાંચ’ અને ભ્રષ્ટાચાર થયો નથી.
