કંબોડિયાના કેમ્પોંગ સ્પ્યુ પ્રાંતમાં લશ્કરી મથક પર દારૂગોળો વિસ્ફોટ થયો હતો. આમાં 20 કંબોડિયન સૈનિકો માર્યા ગયા છે.
કંબોડિયાના પશ્ચિમમાં એક સૈન્ય મથક પર દારૂગોળો વિસ્ફોટ થયો છે. આ દુર્ઘટનામાં 20 જવાનોના મોત થયા છે. સમાચાર એજન્સી એએફપીના અહેવાલ અનુસાર, આ વિસ્ફોટ શનિવારે (27, એપ્રિલ) બપોરે કેમ્પોંગ સ્પ્યુ પ્રાંતના સૈન્ય મથક પર થયો હતો. કંબોડિયાના વડાપ્રધાન હુન માનેટે આ ઘટના પર શોક વ્યક્ત કર્યો છે.
PM હુન માનેટે શનિવારે જણાવ્યું હતું કે દેશના કેમ્પોંગ સ્પ્યુ પ્રાંતમાં લશ્કરી મથક પર દારૂગોળો વિસ્ફોટ થયો હતો. આમાં 20 કંબોડિયન સૈનિકો માર્યા ગયા છે. હુન માનેટે સોશિયલ મીડિયા પ્લેટફોર્મ ફેસબુક પર એક નિવેદનમાં કહ્યું, “વિસ્ફોટ એટલો શક્તિશાળી હતો કે 20 સૈનિકોએ જીવ ગુમાવ્યો અને ઘણા સૈનિકો ઘાયલ પણ થયા.”
પીએમ હુન માનેટે આ ઘટના પર શોક વ્યક્ત કર્યો હતો
વડાપ્રધાન હુન માનેટે અકસ્માતમાં માર્યા ગયેલા લોકોના પરિવારજનો પ્રત્યે સંવેદના વ્યક્ત કરી છે. તેમણે કહ્યું કે વિસ્ફોટની ઘટનાના સમાચાર સાંભળીને મને ખૂબ જ આઘાત લાગ્યો છે. તેમણે કહ્યું કે વિસ્ફોટ કયા કારણોસર થયો તે સ્પષ્ટ નથી. હુન માનેટે કહ્યું કે તેમણે સંરક્ષણ પ્રધાન અને રોયલ કંબોડિયન સશસ્ત્ર દળોના કમાન્ડર-ઇન-ચીફને માર્યા ગયેલા સૈનિકો માટે તાત્કાલિક અંતિમ સંસ્કારની વ્યવસ્થા કરવા આદેશ આપ્યો છે.
સોશિયલ મીડિયા પર વાયરલ થઈ રહેલા ફોટા અને વીડિયો
તે જ સમયે, આ ઘટના સાથે જોડાયેલા કેટલાક વીડિયો અને ફોટા સોશિયલ મીડિયા પર વાયરલ થઈ રહ્યા છે. વાયરલ થયેલા વીડિયો અને તસવીરોમાં આકાશમાં ધુમાડાના ગોટેગોટા દેખાય છે. આ ઉપરાંત એક માળની ઇમારત પણ ધરાશાયી થતી જોવા મળે છે. આ સિવાય સ્થાનિક લોકોએ સોશિયલ મીડિયા પર કેટલીક તસવીરો પણ શેર કરી છે, જેમાં તેમના ઘરની બારીઓ તૂટેલી જોવા મળી રહી છે.
