કોંગ્રેસના નેતા પવન ખેડાએ સેબીના વડા માધબી પુરી બુચ પર અનેક આરોપો લગાવ્યા છે અને તેમની પાસેથી જવાબ માંગ્યો છે અને પીએમ મોદીને પણ આ મુદ્દે જવાબ માંગ્યો છે.
કોંગ્રેસ ફરી એકવાર સેબીના વડા માધબી પુરી બુચ પર પ્રહારો કરી રહી છે. મંગળવારે (03 સપ્ટેમ્બર) કોંગ્રેસના નેતા પવન ખેડાએ સેબીના વડા માધબી પુરી બુચ પર અનેક આરોપો લગાવ્યા હતા. પવન ખેડાએ બુચને ICICI બેંકમાંથી નિવૃત્તિ બાદ આપવામાં આવેલી રકમ પર પણ સવાલો ઉઠાવ્યા છે.
કોંગ્રેસના નેતા પવન ખેરાએ પૂછ્યું કે સેબીના વડા માધાબી પુરી બુચના ICICIમાં તેમના સમય દરમિયાનના તેમના પગાર કરતાં નિવૃત્તિના લાભો કેવી રીતે વધુ હોઈ શકે? આ સાથે તેમણે માંગ કરી હતી કે સેબીએ આ આરોપો અને પ્રશ્નો અંગે સ્પષ્ટતા કરવી જોઈએ. પવને ખેડાએ કહ્યું કે, ‘સેબી ચીફ સામેના આરોપો બાદ દેશના ઘણા રોકાણકારોનો વિશ્વાસ ડગમગી ગયો છે. આ બાબતે તેમણે પોતે સ્પષ્ટતા કરવી જોઈએ તે જરૂરી છે.
વડાપ્રધાન મોદી પાસેથી માંગ્યો જવાબ
પવન ખેડાએ કહ્યું, ‘વડાપ્રધાન નરેન્દ્ર મોદીએ આ મામલે આગળ આવીને જવાબ આપવો જોઈએ કારણ કે તેમણે જ માધબી પુરી બુચને સેબીના અધ્યક્ષ તરીકે નિયુક્ત કર્યા હતા. આ જવાબદારી તેમની છે અને હવે જવાબ આપવો જોઈએ.
પવન ખેડાએ આ પ્રશ્નો ઉઠાવ્યા હતા
પવન ખેડાએ ICICIના ખુલાસાઓમાં અનેક કથિત વિસંગતતાઓ પર પણ સવાલો ઉઠાવ્યા છે. ખેડાએ જણાવ્યું હતું કે, ‘છેલ્લા કેટલાક વર્ષોમાં ચૂકવણીમાં ઘણો તફાવત જોવા મળ્યો છે. કોઈ વ્યક્તિના નિવૃત્તિના લાભો કર્મચારી તરીકેના તેના પગાર કરતાં કેવી રીતે વધી શકે?’
પેન્શન પર ઉઠેલા પ્રશ્નો
ખેડાએ કહ્યું, ‘જો 2014-15માં માધબી પુરી બૂચ અને ICICI વચ્ચે સમાધાન થયું હતું અને તેને 2015-16માં ICICI તરફથી કંઈ મળ્યું નહોતું, તો પછી 2016-17માં ફરીથી પેન્શન કેમ શરૂ થયું? હવે જો માધબી પુરી બૂચના વર્ષ 2007-2008 થી 2013-14 સુધીના સરેરાશ પગારની ગણતરી કરવામાં આવે તો, જ્યારે તે ICICIમાં હતી, ત્યારે તે આશરે રૂ. 1.30 કરોડ હતી પરંતુ માધબી પુરી બુચનું સરેરાશ પેન્શન રૂ. 2.77 કરોડ છે. કયું કામ છે જેમાં પગાર કરતાં પેન્શન વધારે છે?
