SEBI:માર્કેટ રેગ્યુલેટર સિક્યોરિટીઝ એન્ડ એક્સચેન્જ બોર્ડ ઓફ ઈન્ડિયા (સેબી) એ અનિલ અંબાણી અને અન્ય 24 લોકો પર પાંચ વર્ષ માટે મૂડી બજારમાં પ્રતિબંધ મૂક્યો છે. આ સાથે તેને અન્ય લિસ્ટેડ કંપની સાથે સંકળાયેલા રહેવા પર પણ પ્રતિબંધ લગાવી દેવામાં આવ્યો છે. રિલાયન્સ હોમ ફાઇનાન્સ લિમિટેડ (RHFFL) ના ભંડોળને ડાયવર્ટ કરવા બદલ સેબી દ્વારા 24 અન્ય લોકો સાથે ઉદ્યોગપતિ પર પ્રતિબંધ મૂકવામાં આવ્યો છે. તેને બજારમાંથી પ્રતિબંધિત કરવા ઉપરાંત, નિયમનકારે અનિલ અંબાણી પર 25 કરોડ રૂપિયાનો દંડ પણ લગાવ્યો છે. આ આદેશ બાદ અનિલ અંબાણી આગામી પાંચ વર્ષ સુધી કોઈપણ લિસ્ટેડ કંપનીમાં કોઈ મેનેજમેન્ટ પદ પર રહી શકશે નહીં.
અનિલ અંબાણીના પ્રભાવ હેઠળ, મેનેજમેન્ટે કર્યું- SEBI
રિલાયન્સ હોમ ફાઇનાન્સ લિમિટેડ (RHFFL) પર પણ SEBI દ્વારા છ મહિના માટે બજારમાંથી પ્રતિબંધ મૂકવામાં આવ્યો છે. આ ઉપરાંત 6 લાખ રૂપિયાનો દંડ પણ ફટકારવામાં આવ્યો છે. 222 પાનાના આદેશમાં સેબીએ કહ્યું કે અનિલ અંબાણીએ RHFFLના વરિષ્ઠ અધિકારીઓ સાથે મળીને તેમની સાથે જોડાયેલી કંપનીઓને ખોટી રીતે લોન આપી.
SEBIએ કહ્યું, “RHFL ના બોર્ડ ઓફ ડિરેક્ટર્સ દ્વારા ખોટી રીતે લોન આપવા પર વાંધો ઉઠાવવામાં આવ્યો હતો અને કહેવામાં આવ્યું હતું કે કંપનીએ સમયસર કોર્પોરેટ લોનની સમીક્ષા કરવી જોઈએ, પરંતુ કંપનીના મેનેજમેન્ટે તેની અવગણના કરી હતી. આ એક કંપનીમાં શાસનની નિષ્ફળતા હતી. આ અનિલ અંબાણીના પ્રભાવ હેઠળ મેનેજમેન્ટ દ્વારા કરવામાં આવ્યું હતું.
25 કરોડ રૂપિયાનો દંડ
સેબીએ વધુમાં જણાવ્યું હતું કે મેનેજમેન્ટ દ્વારા એવી કંપનીઓને સેંકડો કરોડની લોન આપવામાં આવી હતી કે જેની પાસે કોઈ સંપત્તિ નથી, રોકડ પ્રવાહ નથી, નેટવર્થ નથી અને આવક નથી. પ્રતિબંધિત અન્ય 24માં અમિત બાપના, રવિન્દ્ર સુધલકર અને પિંકેશ આર શાહ જેવા RHFLના વરિષ્ઠ અધિકારીઓનો સમાવેશ થાય છે. સેબીએ બાપના પર રૂ. 27 કરોડ, સુધલકર પર રૂ. 26 કરોડ અને શાહ પર રૂ. 21 કરોડનો દંડ ફટકાર્યો છે.
આ પ્રતિબંધમાં રિલાયન્સ યુનિકોર્ન એન્ટરપ્રાઈઝ, રિલાયન્સ એક્સચેન્જ નેક્સ્ટ, રિલાયન્સ કોમર્શિયલ ફાઈનાન્સ, રિલાયન્સ ક્લિંગેન, રિલાયન્સ બિઝનેસ બ્રોડકાસ્ટ ન્યૂઝ હોલ્ડિંગ અને રિલાયન્સ બિગ એન્ટરટેઈનમેન્ટ પ્રાઈવેટ લિમિટેડના નામ સામેલ છે. આ કંપનીઓ ભંડોળના ગેરઉપયોગમાં સામેલ હતી. તેમાંથી દરેક પર 25 કરોડ રૂપિયાનો દંડ ફટકારવામાં આવ્યો છે.
