Jammu Encounter : જમ્મુ-કાશ્મીરના પૂંછ સેક્ટરમાં સુરનકોટના બહેરામગાલામાં સર્ચ ઓપરેશન દરમિયાન સુરક્ષા જવાનો અને આતંકવાદીઓ વચ્ચે અથડામણ થઈ હતી. ગત 9મીએ રિયાસી આતંકી હુમલા બાદ સેના અને પોલીસના જવાનો દ્વારા સર્ચ ઓપરેશન ચાલી રહ્યું છે.
આ પહેલા શ્રીનગર નજીક બાંદીપોરાના અરગામ વિસ્તારના ગુરિહજનમાં રવિવારે મોડી રાત્રે એન્કાઉન્ટર થયું હતું. જેમાં ઉમર લોન નામના લશ્કર-એ-તૈયબાના આતંકવાદીને સેનાએ ઠાર માર્યો હતો. તે લશ્કર-એ-તૈયબા સંગઠનનો ‘A’ શ્રેણીનો આતંકવાદી હતો.
સમગ્ર વિસ્તારને કોર્ડન કર્યા બાદ સર્ચ ઓપરેશન શરૂ કરવામાં આવ્યું હતું
મળતી માહિતી મુજબ, બહેરામગાલામાં લગભગ પાંચ મિનિટ સુધી બંને તરફથી ગોળીબાર થયો હતો. તે પછી, જ્યારે આતંકવાદીઓ તરફથી ગોળીબાર બંધ થયો, ત્યારે સુરક્ષા દળોએ પણ તેમની તરફથી ગોળીબાર બંધ કરી દીધો. હાલ સમગ્ર વિસ્તારને કોર્ડન કરી લેવામાં આવ્યો છે અને સર્ચ ઓપરેશન ચાલુ છે.
રિયાસી હુમલા બાદ આતંકવાદી ઘટનાઓ ચાલુ છે
તમને જણાવી દઈએ કે રિયાસી આતંકવાદી હુમલા (9 જૂન) પછી જમ્મુ ક્ષેત્રમાં આ છઠ્ઠી આતંકવાદી ઘટના છે. 9 જૂને શિવખોડીથી પરત ફરી રહેલા ભક્તોથી ભરેલી બસ પર આતંકવાદીઓએ હુમલો કર્યો હતો. આ હુમલામાં નવ શ્રદ્ધાળુઓએ જીવ ગુમાવ્યા હતા. જ્યારે 41 શ્રદ્ધાળુઓ ઘાયલ થયા છે. તેના બે દિવસ બાદ જ કઠુઆ અને ડોડામાં આતંકવાદી ઘટનાઓ સામે આવી છે. કઠુઆ આતંકી હુમલામાં સેનાએ બંને આતંકીઓને ઠાર કર્યા હતા. ડોડામાં થયેલા આતંકી હુમલામાં સુરક્ષાદળોના પાંચ જવાન ઘાયલ થયા છે.
