ગુજરાત કોંગ્રેસના દિગ્ગજ નેતા અહેમદ પટેલના પુત્ર ફૈઝલ પટેલ કોંગ્રેસથી નારાજ છે. ફૈઝલ પટેલે હવે કોંગ્રેસ સાથેના સંબંધો તોડવાની જાહેરાત કરી છે. આ સાથે, તેમણે x પર પોસ્ટ કરીને આનું કારણ પણ જણાવ્યું છે. તેમણે કહ્યું છે કે તેઓ પીડા અને વેદનાને કારણે કોંગ્રેસ છોડી રહ્યા છે.
ફૈઝલ પટેલે ટ્વિટર પર લખ્યું, “ખૂબ જ પીડા અને વેદના સાથે મેં કોંગ્રેસ સાથેના મારા રાજકીય સંબંધોનો અંત લાવવાનો નિર્ણય લીધો છે. ઘણા વર્ષોથી આ એક મુશ્કેલ યાત્રા રહી છે. મારા સ્વર્ગસ્થ પિતા અહેમદ પટેલે પોતાનું આખું જીવન દેશ, પાર્ટી અને ગાંધી પરિવાર માટે કામ કરવામાં સમર્પિત કર્યું. મેં તેમના પગલે ચાલવાનો પ્રયાસ કર્યો પરંતુ દરેક પગલે મને ના પાડી દેવામાં આવી. હું શક્ય તેટલા બધા રીતે માનવજાત માટે કામ કરતો રહીશ. કોંગ્રેસ પાર્ટી હંમેશાની જેમ મારો પરિવાર રહેશે. હું કોંગ્રેસના તમામ નેતાઓ, પાર્ટી કાર્યકરો અને શુભેચ્છકોનો આભાર માનું છું જેમણે મને ટેકો આપ્યો.”
ફૈઝલ પટેલ કહે છે કે ઘણા વર્ષોથી તેમને લાગતું હતું કે કોંગ્રેસ તેમની અવગણના કરી રહી છે. તેમના પિતા અહેમદ પટેલ તેમના સમયમાં કોંગ્રેસ અધ્યક્ષ સોનિયા ગાંધીના મુખ્ય સલાહકાર હતા. અહેમદ પટેલ રાજકારણમાં એક મોટું નામ રહ્યું છે.
કોંગ્રેસમાં વિખવાદ 2024 થી શરૂ થયો હતો
ફૈઝલ પટેલ અને કોંગ્રેસ વચ્ચેનો મતભેદ 2024 માં શરૂ થયો જ્યારે તેમના પિતા અહેમદ પટેલની ભરૂચ લોકસભા બેઠક કોંગ્રેસે અરવિંદ કેજરીવાલની આમ આદમી પાર્ટીને આપી દીધી. સીટ શેરિંગ ફોર્મ્યુલા હેઠળ, કોંગ્રેસે ભરૂચ અને ભાવનગર સીટ ઇન્ડિયા એલાયન્સના સાથી પક્ષ AAPને આપી હતી.
તે સમયે મીડિયા સાથે વાત કરતી વખતે ફૈઝલ પટેલે નારાજગી વ્યક્ત કરી હતી અને કહ્યું હતું કે તેઓ કોઈપણ સંજોગોમાં લોકસભાની ચૂંટણી લડશે. તેમણે કહ્યું હતું કે કોંગ્રેસ ભરૂચ બેઠક જીતી શકી હોત કારણ કે તેમણે તેમના પિતાના મૃત્યુ પછી આ વિસ્તારમાં સખત મહેનત કરી હતી. સાથે જ તેમણે એમ પણ કહ્યું કે ભરૂચ સાથે તેમનો પારિવારિક લગાવ છે. ગઠબંધન ખાતર તે પોતાના પિતાની બેઠક આ રીતે છોડી શકે નહીં.
