દિલ્હી વિધાનસભા ચૂંટણીના પરિણામો બહાર આવી ગયા છે. આમ આદમી પાર્ટીની ચૂંટણીમાં હાર પર પાર્ટીના રાષ્ટ્રીય સંયોજક અરવિંદ કેજરીવાલે પોતાની પહેલી પ્રતિક્રિયા આપી છે. તેમણે ભારતીય જનતા પાર્ટી (ભાજપ) ને વિજય બદલ અભિનંદન આપ્યા અને પાર્ટીની ભાવિ યોજનાઓ સમજાવી. તેમણે કહ્યું કે આમ આદમી પાર્ટી હવે દિલ્હીમાં સક્રિય વિપક્ષની ભૂમિકા ભજવશે.
AAP કન્વીનર અને દિલ્હીના ભૂતપૂર્વ મુખ્યમંત્રી અરવિંદ કેજરીવાલે કહ્યું, “અમે દિલ્હીના જનાદેશને ખૂબ જ નમ્રતાથી સ્વીકારીએ છીએ. હું ભાજપને આ જીત માટે અભિનંદન આપું છું અને આશા રાખું છું કે તેઓ તે બધા વચનો પૂરા કરશે જેના માટે લોકોએ તેમને મત આપ્યા છે.”
કેજરીવાલ હવે શું કરશે?
તેમણે વધુમાં કહ્યું, “અમે છેલ્લા 10 વર્ષમાં આરોગ્ય, શિક્ષણ અને માળખાગત સુવિધાઓના ક્ષેત્રમાં ઘણું કામ કર્યું છે. અમે ફક્ત રચનાત્મક વિપક્ષની ભૂમિકા જ નહીં ભજવીએ પણ લોકોની વચ્ચે રહીશું અને તેમની સેવા કરતા રહીશું. હું આમ આદમી પાર્ટીના કાર્યકરોને સખત મહેનતથી ચૂંટણી લડવા બદલ અભિનંદન આપું છું.”
